مبشر زیدی بی بی سی اردو ڈاٹ کام، اسلام آباد

	میجر جنرل( ریٹائرڈ) محمود علی درانی پاک، بھارت امن کی کوششوں میں سرگرم رہے ہیں۔

میجر جنرل محمود علی درانی انیس سو ستتر سے لے کر انیس سو بیاسی تک امریکہ میں پاکستان کے ملٹری اتاشی رہے ہیں۔

محمود علی درانی نے فوج سے ریٹائرمنٹ کے بعد سے پاکستان اور بھارت کے درمیان ٹریک ٹو یا غیر سرکاری سطح پر تعلقات میں بہتری کے لیئے کیئے جانے والے مذاکرات میں خاصے سرگرم رہے ہیں۔وہ پاکستان-بھارت تعلقات پر کئی کتابیں بھی لکھ چکے ہیں۔

محمود علی درانی کے بارے میں کہا جاتا ہے کہ وہ امریکی حکومتی حلقوں میں بھی کافی اثرورسوخ رکھتے ہیں۔

ان کی تعیناتی ایک ایسے وقت میں ہو رہی ہے جب امریکہ میں چند حلقوں کی طرف سے پاکستان کے دہشت گردی کے خلاف جنگ میں کردار کے بارے میں انگلیاں اٹھائی جا رہی ہیں۔اب دیکھنا یہ ہو گا کہ میجر جنرل درانی کس طرح امریکی انتظامیہ میں پاکستان کی حکومت کا اعتماد بڑھاتے ہیں۔

وہ نوے کی دہائی میں پاکستان آرڈیننس فیکٹری کے سربراہ بھی رہے ہیں۔

ایک وقت میں جب سابق فوجی ڈکٹیٹر ضیا الحق انیس سو اٹھاسی میں حادثے کا شکار ہوئے تو ان کے صاحبزادے اور آج کے وفاقی وزیر اعجاز الحق نے مطالبہ کیا تھا کہ ضیا الحق کے حادثے میں مارے جانے کی تحقیقات کے بارے میں میجر جنرل محمود علی درانی کو بھی شامل تفتیش کیا جائے،تاہم ضیا الحق کے مبینہ قتل کی تحقیقاتی رپورٹ کبھی بھی منظر عام پر نہیں آئی۔