عزیزاللہ خان بی بی سی اردو ڈاٹ کام کوئٹہ

	بلوچستان میں سخت حفاظتی انتظامات کے باوجود دھماکے جاری ہیں

کوئٹہ میں ریلوے کے حکام نے بتایا ہے کہ یہ پل کوئٹہ سے کوئی سینتیس کلومیٹر دور سپیزنڈ اور کولپور کے درمیان واقع ہے۔ پل کی لمبائی دس فٹ ہے اور دھماکے سے اس کے سلیپر اڑ گئے ہیں۔

دھماکہ آج صبح سویرے ہوا ہے جس کے بعد ریل گاڑیوں کو مختلف مقامات پر روک دیا گیا ہے۔ کوئٹہ سے صبح ساڑھے چھ بجے روانہ ہونے والی چلتن ایکسپریس کو سریاب میں روک دیا گیا ہے جبکہ کوئٹہ پہنچنے والی ریل گاڑیاں جیسے بولان می،ل بلوچستان ایکسپریس اور جعفر ایکسپریس کو کولپور اور سبی کے مقامات پر روک دیا گیا ہے۔

جمعہ سبی ہرنائی سیکشن پر پل نمبر پینتالیس پی کو دھماکے سے اڑا دیا گیا تھا جبکہ تین روز پہلے اسی سیکشن پر پل نمبر تینتالیس پی کو اڑایا گیا تھا۔ سبی ہرنائی سیکشن پر ریل سروس ڈیڑھ ماہ سے بند ہے اور گزشتہ تین ماہ میں اس سیکشن پر یہ بارہواں حملہ تھا جس میں نو دھماکے اور تین فائرنگ کے واقعات شامل ہیں۔ مین لائن اور کوئٹہ تفتان لائن پر دھماکے اس کے علاوہ ہیں۔