اعجاز مہر بی بی سی اردو ڈاٹ کام، اسلام آباد

	افغان پناہ گزینوں کے اندارج کا کام نادرہ کے سپرد کیا گیا ہے

اس معاہدے کے تحت پاکستان حکومت کا ادارہ ’نادرہ، اندراج کا کام کرے گا اور افغان پناہ گزینوں کو خصوصی کارڈ بھی جاری کرے گا۔ اندراج کے وقت متعلقہ افراد کی انگلیوں کے نشانات سمیت مختلف معلومات پر مبنی ایک ’ڈیٹا بیس، تیار ہوگا۔

بدھ کے روز اس یاداشت پر حکومت پاکستان کی جانب سے ’سیفران ڈویژن، کے سیکریٹری ساجد حسین چٹھہ، وزارت داخلہ کے ایڈیشنل سیکریٹری قمر الزمان چودھری اور اقوام متحدہ کے نمائندے Guenet Guebre Christos نے دستخط کیے۔

’سیفران ڈویژن کے وفاقی وزیر سردار یار محمد رند کا کہنا ہے کہ اس معاہدے سے جو معلومات حاصل ہوں گی اس سے جہاں پاکستان کو فائدہ ہوگا وہاں افغانستان کی حکومت کو بھی اپنے شہریوں کو واپس بلانے اور آباد کرنے کے بارے میں منصوبہ بندی کے لیے مدد ملے گی۔

اقوام متحدہ کے ترجمان کا کہنا ہے کہ افغان پناہ گزینوں کا اندراج رواں سال کے آخر تک شروع ہوگا اور گزشتہ برس ان کی ہونے والی مردم شماری کا یہ ’فالو اپ، ہوگا۔

ان کا کہنا ہے کہ پاکستان سے افغان پناہ گزینوں کی رضاکارانہ واپسی کا سن دو ہزار تین سے شروع ہونے والے پروگرام کے تحت تاحال ستائیس لاکھ پناہ گزین واپس جاچکے ہیں جبکہ اب بھی چھبیس لاکھ کے قریب افغانی باشندے پاکستان میں ہیں۔

افغان پناہ گزینوں کے اندراج میں فنی مدد اور مانیٹرنگ کے لیے اقوام متحدہ کا متعلقہ ادارہ ساٹھ لاکھ ڈالر کی رقم کا انتظام کرے گا۔ معاہدے کے مطابق جو افغانی واپس جائیں گے ان کے کارڈ منسوخ کردیے جائیں گے۔

اقوام متحدہ کی ڈپٹی ہائی کمشنر برائے پناہ گزیں وینڈی چیمر لین نے گزشتہ روز وزیر داخلہ سے بھی ملاقات کی تھی اور اس بات پر اتفاق ہوا تھا کہ پاکستان میں رہائش پدیر افغان باشندوں کو واپس وطن جانے کے لیے پرکشش پیکیج پیش کیا جائے اور اس کے لیے رقم اکٹھی کرنے کی خاطر ڈونر کانفرنس بلائی جائے۔

واح رہے کہ اقوام متحدہ کے پروگرام کے تحت واپس افغانستان جانے والے پناہ گزینوں میں سے کئی کے واپس پاکستان آنے کے متعلق بھی حال ہی میں مقامی اخبارات میں خبریں شایع ہوئیں ہیں۔