عزیزاللہ خان بی بی سی اردو ڈاٹ کام، کوئٹہ

افغان پناہ گزینوں کے پاس بہت کم راستے ہیں

چمن میں اس وقت کوئی بہتر ہزار افغان پناہ گزین موجود ہیں جن کے پاس صرف دو راستے ہیں۔ ایک یہ کہ وہ اپنے ملک واپس چلے جائیں اور دوسرا مسلم باغ کے مہاجرین کیمپ میں پناہ لیں۔

یہاں یہ امر قابل ذکر ہے کہ مسلم باغ کے لوگوں اور منتخب نمائندوں نے ان پناہ گزینوں کی ان کے علاقے منتقلی کی مخالفت کی ہے اور کہا ہے کہ پاک۔ افغان سرحد سے دور بھیج کر شہر میں امن و امان کی صورتحال پیدا کی جا رہی ہے۔

اقوام متحدہ کے ادارہ برائے مہاجرین کے ترجمان بابر بلوچ نے بتایا ہے کے پیر کے دن چالیس پناہ گزینوں کو نئے کیمپ کا دورہ کرایا گیا اور انھیں موجودہ سہولیات سے آگاہ کیا گیا ۔ ان کی منتقلی کا سلسلہ اگلے ماہ کے وسط سے شروع ہونے کی توقع ہے۔

بابر بلوچ نے کہا ہے کہ ان پناہ گزینوں کی منتقلی کا فیصلہ پاکستان، افغانستان اور اقوام متحدہ کے اداہ برائے مہاجرین کے مشترکہ اجلاس میں کیا گیا تھا۔ یہاں آمدہ اطلاعات کے مطابق افغانستان میں تعینات امریکی اہلکار اور افغان حکومت نے سرحد کے قریب پناہ گزینوں کی موجودگی پر اعتراض کیا تھااور کہا تھا کہ انھیں افغانستان کی سرحد سے دور رکھا جائے۔

اس فیصلے پر متحدہ مجلس عمل کے سینیئر وزیر مولانا عبدالواسع نے سخت رد عمل کا اظہار کرتے ہوئے کہا ہے کہ مسلم باغ اور ارد گرد کے قبائل ان پناہ گزینوں کو اپنے علاقے میں برداشت نہیں کریں گے۔

انھوں نے کہا ہے کہ اگر یہ پناہ گزین سرحد کے قریب مشکلات پیدا کر سکتے ہیں تو شہر کے اندر آگئے تو کیا نہیں کریں گے لہذا افغان حکومت ان پناہ گزینوں کو اپنے ملک میں رکھے۔