عزیز اللہ خان بی بی سی اردو ڈاٹ کام، کوئٹہ

	مینگل کے گھر کے محاصرے پر احتجاج

اس دوران فائرنگ سے تین فوجیوں کے ہلاک ہونے کی بھی اطلاع ہے لیکن سرکاری سطح پر اس کی تصدیق نہیں ہو سکی۔ پانچ فوجیوں کے زخمی ہونے کی بھی اطلاع ہے۔

وڈھ سے ملنے والی اطلاعات کے مطابق فوجیوں کی دو گاڑیاں اسی علاقے سے اس وقت گزر رہی تھیں جب لوگوں نے سڑک بلاک کر رکھی تھی۔ پولیس اور لیویز اہلکاروں نے بتایا ہے کہ علاقے سے فوجیوں کی ایک گاڑی الٹنے اور فائرنگ کی اطلاعات بھی موصول ہوئی ہیں جس میں جانی نقصان تو ہوا ہے لیکن اب تک صورتحال واضح نہیں ہے۔ انہوں نے کہا ہے کہ تین اہلکاروں کے ہلاک ہونے اور ایک گاڑی کو آگ لگا دینے کی اطلاع ہے لیکن اس کی تصدیق نہیں ہو رہی۔

وڈھ سے مقامی صحافی خان محمد نے بتایا ہے کہ علاقے میں کافی کشیدگی پائی جاتی ہے ۔ یہ اب تک معلوم نہیں ہو سکا کہ فائرنگ مظاہرین نے کی ہے اور یا نامعلوم افراد فائرنگ کرکے فرار ہو گئے ہیں۔

بلوچستان نیشنل پارٹی کے سیکرٹری اطلاعات ثناء بلوچ سے رابطہ قائم کیا تو انھوں نے کہا کہ سردار اختر مینگل اور سردار عطاءاللہ مینگل کی رہائش گاہوں کے محاصرے کے حوالے سے وڈھ اور خضدار میں لوگ مشتعل ہیں۔

انہوں نے اس بارے میں صوبائی حکام سے رابطے کیے ہیں اور انھیں کہا ہے کہ اس معاملے کو مذاکرات سے سلجھایا جائے اور اگر کوئی مطلوب ہے تو اسے وہ گرفتار کریں خوف و ہراس کی فضا کو ختم کیا جائے۔

صوبائی حکومت کے ترجمان رازق بگٹی سے رابطہ قائم کیا گیا توانہوں نے کہا کہ اب تک انھیں اس واقعہ کی تفصیلات موصول نہیں ہوئیں۔