مبشر زیدی بی بی سی اردو ڈاٹ کام، اسلام آباد

	جہاز رانی کا ایک نیا معاہدہ کرنے پر بھی اتفاق کیا گیا ہے

اسلام آباد میں وفود کی سطح پر ہونے والی اس بات چیت میں بھارتی وفد کی قیادت سیکرٹری تجارت ایس این مینن جبکہ پاکستانی وفد کی قیادت ان کے ہم منصب آصف شاہ نے کی۔

دونوں ممالک نے بحری راستے سے تجارت کے لیئے جہاز رانی کا ایک نیا معاہدہ کرنے پر بھی اتفاق کیا جس پر مستقبل قریب میں انڈیا کے دارالحکومت نئی دلی میں دستخط کیئے جائیں گے۔

پاکستان اور انڈیا اپنے اپنے باسمتی چاول کے برانڈ عالمی طور پر رجسٹر کرانے اور آئندہ حاصل کردہ مخصوص ناموں کے ساتھ چاول دنیا میں فروخت کریں گے۔
اس کے علاوہ بھارت سے پاکستان چائے کی درآمد کے لئے دونوں ممالک کے تجارتی وفود کے تبادلے کی حوصلہ افزائی کی جائے گی اور پاکستان بھارت سے درآمدی اشیا کی لسٹ میں اضافے کے لیئے تمام قانونی پہلوؤوں کا جائزہ لینے کے بعد ان میں اضافہ کرے گا۔

تاہم اس مشترکہ اعلامیے میں اس بات کا ذکر نہیں ہے کہ آیا پاکستان بھارت کو تجارت کے شعبے میں پسندیدہ ترین ملک کا درجہ دے گا یا نہیں۔ بھارت دس سال قبل پاکستان کو یہ درجہ دے چکا ہے مگر پاکستانی حکومت کا مؤقف ہے کہ بھارت کو یہ درجہ اس وقت تک نہیں دیا جا سکتا جب تک دونوں ممالک کے درمیان بنیادی مسائل خصوصاً مسئلۂ کشمیر حل نہیں ہو جاتے۔