اعجاز مہر بی بی سی اردو ڈاٹ کام، اسلام آباد

	کارکردگی کی بنیاد پر وزراء کے محکمے بھی تبدیل کیے جائیں گے: شوکت عزیز

یہ بات انہوں نے جمعہ کے روز وزیراعظم ہاوس میں ایک پریس کانفرنس کے دوران پوچھے گئے مختلف سوالات کے جواب میں کہی۔

دریں اثناء جمعہ کی شام حکومت نے ایک نوٹیفکیشن جاری کیا ہے جس میں وزیراعظم شوکت عزیز کی کابینہ کے تین وزیروں کو سبکدوش کردیا گیا ہے۔ کابینہ ڈویژن سے یہ نوٹیفکیشن جاری تو سترہ مارچ کو کیا ہے لیکن اس کا اطلاق گیارہ مارچ سے ہوگا۔

تین وزارء میں سے کھیل اور ثقافت کے امور کے وفاقی وزیر محمد اجمل خان، نجکاری کے وفاقی وزیر عبدالحفیظ شیخ اور وزیر مملکت برائے داخلہ شہزاد وسیم شامل ہیں۔

تینوں وزرا کا تعلق حکمران مسلم لیگ سے ہے اور وہ پہلے سینیٹرز تھے لیکن قرعہ اندازی کے ذریعے ان کی مدت ختم ہونے کے بعد وہ دوبارہ منتخب نہیں ہوپائے۔

شوکت عزیز نے بتایا کہ سنیٹ کے نصف یعنی پچاس اراکین کے دوبارہ منتخب ہونے کے بعد کابینہ میں توسیع اور ردو بدل ضروری ہوگئی ہے۔ ان کے مطابق کچھ وزراء کی کارکردگی کی بنا پر ان کے محکمے تبدیل کیے جائیں گے۔

واضح رہے کہ حکومتی اتحاد کے فریقین مسلم لیگ، متحدہ قومی موومنٹ، پاکستان پیپلز پارٹی ( شیرپاؤ) اور فاٹا کے آزاد اراکین کی کوشش ہے کہ انہیں زیادہ نمائندگی ملے۔ خود حکمران مسلم لیگ میں وزارتیں نہ ملنے کی وجہ سے فارورڈ بلاک بھی بنا تھا۔

ملک کے سابق صدر فاروق لغاری اور سابق نگران وزیر اعظم غلام مصطفیٰ جتوئی جنہوں نے اپنی جماعتیں مسلم لیگ میں ضم کی تھیں کے علاوہ پیر پگاڑہ پہلے ہی اپنے حامیوں کو زیادہ اور من پسند وزارتیں نہ ملنے کی وجہ ناراضگی کا اظہار کرتے رہے ہیں۔

وزیراعظم کی پریس کانفرنس کا بنیادی مقصد تو پانچ ارب روپوں کی مالیت سے قائم کردہ ’خوشحال پاکستان فنڈ، کے قیام کا اعلان کرنا تھا لیکن ان سے مختلف معاملات کے بارے میں سوالات ہوئے۔

انہوں نے بتایا کہ اس نئے فنڈ کا بنیادی مقصد کم ترقی یافتہ علاقوں کے لوگوں کو اپنے پاؤں پر کھڑا کرنے میں مدد دینے اور انہیں بنیادی سہولیات کی فراہمی ہے۔

ان کے مطابق مقامی حکومتیں اس فنڈ کے استعمال کے بارے میں پسماندہ علاقوں کی نشاندہی کریں گی اور وہاں رقوم استعمال کی جاسکیں گی۔