اعجاز مہر بی بی سی اردو ڈاٹ کام، اسلام آباد

	حامد کرزئی نے اپنے دورے کے دوران یہ فہرست پاکستان کے حوالے کی تھی

پیر کی شام ہفتہ وار بریفنگ کے دوران انہوں نے بتایا کہ اس فہرست میں اسامہ بن لادن کا نام شامل نہیں ہے اور ان کے متعلق کسی کو پتہ بھی نہیں کہ وہ کہاں ہیں۔ انہوں نے کہا کہ اگر اسامہ بن لادن کی موجودگی کے بارے میں کسی کو علم ہوتا تو وہ پکڑے جاتے۔

طالبان رہنما ملا محمد عمر کے پاکستان میں ہونے کے متعلق سوال پر انہوں نے کہا کہ افغان صدر نے اس بارے میں کچھ معلومات دی تھی اور اس کی تصدیق کرانے کے بعد یہ واضح ہوا ہے کہ ان کی معلومات درست نہیں۔

امریکی صدر جارج ڈبلیو بش کے دورے کے متعلق سوال پر ترجمان نے بتایا کہ امریکی صدر دو روزہ پاکستان کے دورے پر آرہے ہیں لیکن حفاظتی اقدامات کے پیش نظر انہوں نے کہا کہ وہ اس بارے میں مزید کچھ نہیں بتائیں گی۔

تاہم تسلیم اسلم خان نے کہا کہ صدر جنرل پرویز مشرف اور صدر بش کی ملاقات میں جوہری بجلی پیدا کرنے کے بارے میں دونوں ممالک کے تعاون کے موضوع پر بات چیت ہوگی۔

جب ان سے پوچھا گیا کہ امریکی صدر جارج بش نے حال ہی میں دیے گئے ایک انٹرویومیں کہا ہے کہ وہ کشمیری شدت پسندوں کے تربیتی کیمپ بند کرنے کے بارے میں پاکستان سے معاملہ اٹھائیں گے تو ترجمان کا کہنا تھا کہ انہوں نے صدر بش کا انٹرویو دیکھا ہے اور اس میں کہیں بھی ایسے کیمپوں کا ذکر نہیں۔

اس فہرست میں اسامہ بن لادن کا نام شامل نہیں ہے اور ان کے متعلق کسی کو پتہ بھی نہیں کہ وہ کہاں ہیں۔ انہوں نے کہا کہ اگر اسامہ بن لادن کی موجودگی کے بارے میں کسی کو علم ہوتا تو وہ پکڑے جاتے۔

پاکستان میں انسانی حقوق کی صورتحال پر ’ایمنیسٹی انٹرنیشنل‘ کی حالیہ رپورٹ میں تشویش ظاہر کرنے کے سوال پر ترجمان نے کہا اس رپورٹ پر انہیں افسوس ہے۔

انہوں نے مزید کہا کہ اس رپورٹ میں انسانی حقوق کی خلاف ورزیوں کے متعلق عمومی نوعیت کا حسب معمول ایک بیان ہے۔ انہوں نے دعویٰ کیا کہ پاکستان میں میڈیا آزاد ہے اور حکومت نے انسانی حقوق کے لیے کئی اقدامات کر رکھے ہیں۔

جموں و کشمیر میں کرکٹ کھیلتے ہوئے چار بچوں کو مبینہ طور پر بھارتی فوج کی جانب سے ہلاک کیے جانے پر انہوں نے کہا کہ یہ انسانی حقوق کی خلاف ورزی ہے اور پاکستان متعلقہ فورم پر یہ معاملہ اٹھائے گا۔