مبشر زیدی بی بی سی اردو ڈاٹ کام، اسلام آباد

	پاکستان کے مختلف شہروں میں متنازع کارٹونوں کے معاملے پر بڑی بڑی ریلیاں اور احتجاجی جلوس منعقد ہوئے

حزب اختلاف کے رہنماؤں کا کہنا ہے کہ حکومت اس مسئلے پر سنجیدہ نہیں ہے جبکہ حکومت نے الزام لگایا ہے کہ حزب اختلاف کی جماعتیں اس مسئلے کو سیاسی مقاصد کے لئے استعمال کرنا چاہتی ہیں۔

پاکستان میں کارٹونوں پر احتجاج

اسی سلسلے میں حکومت نے حزب اختلاف کو بھی اس وفد میں شمولیت کی دعوت دی تھی۔ تاہم حزب اختلاف کی جماعتوں نے آج اسلام آباد میں ایک اجلاس کے بعد فیصلہ کیا ہے کہ حزب اختلاف کا کوئی نمائندہ اس وفد میں شامل نہیں ہو گا۔

اتحاد برائے بحالی جمہوریت کے رہنما مخدوم امین فہیم نے اجلاس کے بعد بی بی سی کو بتایا کہ حکومت اس مسئلے پر سنجیدہ نہیں ہے جس کا ثبوت یہ ہے کہ گزشتہ ہفتے ممبران پارلیمان کی طرف سے ان خاکوں کے خلاف احتجاج کے طور پر نکالے گئے جلوس میں ایک بھی حکومتی وزیر نے شرکت نہیں کی تھی۔انہوں نے کہا کہ حزب اختلاف کی جماعتوں کو وزیر اعظم شوکت عزیز نے اس وفد میں شمولیت کی دعوت دی تھی مگر حزب اختلاف کے رہنماؤں نے فیصلہ کیا ہے کہ ان خاکوں کے خلاف احتجاج کو ملک کے اندر تک محدود رکھنا چاہیے۔

ادھر دینی جماعتوں کے اتحاد مجلس عمل کے رہنما حافظ حسین احمد کا کہنا ہے کہ پارلیمانی وفد کو برسلز بھیجنے کا مقصد در حقیقت ملک میں ان خاکوں کی اشاعت پر جاری مظاہروں کو روکنا ہے جو کسی صورت برداشت نہیں کیا جائے گا۔

حزب اختلاف کے اس فیصلے پر اپنے رد عمل میں وفاقی وزیر اطلاعات شیخ رشید کا کہنا ہے کہ حزب اختلاف کی جماعتیں اس مسئلے کو سیاسی مقصد کے لئے استعمال کر کے ملک میں جلسے جلوس نکال کر شور شرابا برپا رکھنا چاہتی ہیں۔ انہوں نے کہا کہ حکومت کی طرف سے بنائے جانے والے اس پارلیمانی وفد کا مقصد یورپی رہنماؤں کو یہ باور کروانا تھا کہ مسلمانوں کے دلوں میں پیغمبر اسلام کی بڑی اہمیت ہے اور مسلم دنیا ان کی تضحیک کسی صورت برداشت نہیں کر سکتی۔