مبشر زیدی بی بی سی اردو ڈاٹ کام، اسلام آباد

	بل کلنٹن اوروزیر اعظم شوکت عزیز مفاہمت کی یاداشت پر دستخط کرتے ہوئے

سابق امریکی صدر جو آج پاکستان کے دورے پر اسلام آباد پہنچے ہیں انہوں نے پاکستان کے صدر جنرل پرویز مشرف اور وزیر اعظم شوکت عزیز سے ملاقات کی۔اس ملاقات کے بعد بل کلنٹن اور وزیر اعظم شوکت عزیز نے مفاہمت کی یاداشت پر دستخط کیئے۔

سابق امریکی صدر نے مفاہمتی یاداشت پر دستخط کے بعد صحافیوں سے بات کرتے ہوئے پاکستان سے ایڈز کے خاتمے کے لیئے حکومت پاکستان کی طرف سے کی گئی کوششوں کی تعریف کی اور کہا کہ دنیا کے کئی ممالک اس موذی مرض کے خلاف جنگ میں وہ کوششیں نہیں کر رہے جو پاکستان کی حکومت نے کی ہیں۔

کلنٹن فاؤنڈیشن پاکستانی حکومت کو ایڈز کے ریپڈ ٹیسٹ اور ادویات عام قیمت سے ستر فی صد کم قیمت پر فراہم کرے گی بل کلنٹن

سابق امریکی صدر نے دہشت گردی کے خلاف جنگ میں پاکستان کے کردار کی تعریف کی اور کہا کہ پاکستان دنیا میں بین المذاہب ہم آہنگی قائم کرنے کے لیئے اہم کردار ادا کر رہا ہے۔

اس موقع پر پاکستانی وزیر اعظم شوکت عزیز نے بل کلنٹن کا پاکستان آمد پر ان کا شکریہ ادا کرتے ہوئے کہا کہ کلنٹن فاؤنڈیشن کی مدد سے پاکستانی حکومت کو ایڈز کی روک تھام میں خاصی مدد ملے گی۔

بل کلنٹن نے یورپی اخبارات میں پیغمبر اسلام کے بارے میں شائع کیئے جانے والے کیری کیچرز کو غلط قرار دیتے ہوئے کہا کہ اس سے اسلامی دنیا میں لوگوں کے احساسات مجروح ہوئے ہیں۔ انہوں نے کہا کہ وہ ان کیری کیچرز کی اشاعت سے قطعًا اتفاق نہیں کرتے۔

انہوں نے مزید کہا کہ لوگوں کے مذہبی جذبات کا احترام کرنا ضروری ہے اور ذرائع ابلاغ کو مذہبی تضحیک کی اجازت نہیں ہونی چاہئے۔