سوڈان کی خانہ جنگی میں ایک سال کے اندر دس ہزار لوگ ہلاک ہوئے ہیں

یہ واضح نہیں ہے کہ پاکستان کو فوجی امداد کی شکل میں ملنے والی تین سو ملین ڈالر کی یہ رقم نئی ہے یا پرانی امریکی امداد کا حصہ ہے۔ نئے بل کے تحت اسرائیل کو دو اعشاریہ دو بلین ڈالر اور پولینڈ کو چھیاسٹھ ملین ڈالر کی فوجی امداد ملے گی۔

اس بل کی منظوری سے افغانستان کو نوسو ستتر ملین ڈالر کی فوجی اور اقتصادی امداد حاصل ہوگی جس میں چار سو ملین ڈالر نئی افغان فوج کی تربیت کے لئے مختص کیے گئے ہیں۔

کانگریس کے ایوان نمائندگان کی کمیٹی نے غیرملکی امداد کے لئے کل ملاکر انیس اعشاریہ چار بلین ڈالر کے بل کی منظوری دی۔ اس امداد کے تحت سوڈان میں فاقہ کشی اور لڑائی کے شکار افراد کی امداد کے لئے تین سو گیارہ ملین ڈالر کی امداد مہیا کی گئی ہے۔

اس بل کی خصوصی بات یہ بھی ہے کہ صدر جارج بش کی جماعت ریپبلیکن پارٹی کے قانون سازوں نے حزب اختلاف کی اس کوشش کو ناکام بنادیا جس کے تحت عراق، افغانستان اور چار دیگر ایشیائی اور افریقی ممالک میں اقوام متحدہ کے فیملی پلاننگ پروگرام کے لئے پچیس ملین ڈالر کی امداد کی درخواست کی گئی تھی۔

ریپبلیکن پارٹی کے حمایتی یہ الزام لگاتے رہے ہیں کہ اقوام متحدہ کے فیملی پلاننگ پروگرام کے تحت دنیا کے مختلف ممالک میں اسقاط حمل کو فروغ دیا جارہا ہے۔امریکہ کے قدامت پرست معاشرے میں صدر بش کی جماعت اسقاط حمل کے سخت خلاف ہے جس سے ان کی جماعت کو ووٹ بھی حاصل کرنے میں مدد مل سکتی ہے۔

لیکن حـزب اختلاف کا کہنا ہے کہ اقوام متحدہ کے فیملی پلاننگ پروگرام کے تحت غریب ممالک میں ایڈز کی بیماری کی روک تھام کے لئے کوششیں کی جارہی ہیں اور اقوام متحدہ کو امداد نہ دینے سے ان کوششوں کو نقصان پہنچے گا۔