اعجاز مہر بی بی سی اردو ڈاٹ کام، کوئٹہ

	ہزارہ برداری کی طرف سے بلوچوں کی حمایت کئے جانے کو مبصرین بڑی اہمیت کی نگاہ سے دیکھ رہے ہیں

یہ پہلا موقع ہے کہ ہزارہ برادری کے کچھ افراد نے اپنی برادری کی بنیاد پر احتجاجی جلوس نکالا اور بلوچستان کے قوم پرستوں سے اظہار یکجہتی کے طور پر ان کے حق میں احتجاج کیا ہے۔

مظاہرین نے اس موقع پر صدر جنرل پرویز مشرف اور وزیراعلیٰ جام یوسف کے خلاف نعرے لگائے اور ان کی پالیسیوں کو مسترد کیا۔

مظاہرے میں زیادہ تر نوجوان اور کچھ بزرگ بھی شامل تھے۔ مظاہرین نے سیاہ پرچم لہرائے اور ہاتھوں میں بینر اور پلے کارڈ بھی اٹھا رکھے تھے۔ جن پر فوجی آپریشن بند کریں اور بلوچستان کے عوام کو روزگار دیں جیسے مطالبے بھی لکھے تھے۔

	کوئٹہ کے اردگر ہزارہ برادری کی اکثریت ہے

لیکن سیاسی تجزیہ کار ان کے اس مظاہرے کو خاصی اہمیت دے رہے ہیں اور ان کا کہنا ہے کہ انہیں ایسا لگتا ہے کہ پشتونوں کے بعد ہزارہ برادری کی جانب سے بلوچوں کی حمایت سے چھوٹے لسانی گروپ بھی ان کی حمایت کرسکتے ہیں جس سے بلوچوں کے موقف کو تقویت مل سکتی۔

مظاہرے کے شرکا سے ان کی برادری کے طاہر ہزارہ اور علی رضا منگول سمیت مختلف سیاسی جماعتوں کے نمائندوں نے خطاب کیا۔

مقررین نے کہا کہ اگر حکمران چاہتے ہیں کہ دوبارہ ملک ٹوٹے تو پھر بیشک فوجی آپریشن جاری رکھیں۔ انہوں نے کہا کہ باجوڑ ایجنسی میں امریکی فوج کے حملے پر حکومت مذمت نہیں کرسکتی جہاں غیر ملک سے حملہ کیا گیا۔
انہوں نے کہا کہ غیر ملک حملہ کرے تو ٹھیک لیکن لیکن بلوچستان میں ’رٹ، قائم کرنے کے لیے اپنے شہریوں پر جنگی جہازوں سے بمباری کریں، یہ کہاں کا انصاف ہے؟۔