مبشر زیدی بی بی سی اردو ڈاٹ کام، اسلام آباد

	الائی میں لوگوں کو برفباری سے پہلے عارضی پناگاہوں میں منتقل کیا جانا ہے

ماہرین کے مطابق مقامی لوگوں نےاس لینڈ سلائیڈنگ کے بعد چٹانوں کے ٹوٹنے کو دھماکوں پر محمول کیا ہوگا اور اس کے نتیجے میں اٹھنے والے دھویں کو گیسوں کا اخراج سمجھے ہوں گے۔

جیولوجیکل سروے آف پاکستان کے ڈائریکٹر اللہ بخش نے کہا ہے کہ ان کے ڈیپارٹمنٹ کے دو ماہرین ارضیات نصیر علی خان اور عبدالماجد نے وادی الائی کا سروے کیا ہے اور اس کے بعد وہ اس نتیجے پر پہنچے ہیں کہ علاقے میں آٹھ اکتوبر کے بعد آنے والے زلزلے کے جھٹکوں یا آفٹر شاکس کی شدت اس وجہ سے زیادہ تھی کیونکہ یہ علاقہ ایکٹو فالٹ لائن پر واقع ہے ۔

انہوں نے کہا کہ تئیس اکتوبر کو علاقے میں آنے والے زلزلے کا مرکز الائی کے نزدیک ہی تھا لہذا اس کے بعد علاقے میں شدید لینڈ سلائیڈنگ ہوئی تھی۔

اللہ بخش کے مطابق اس علاقے سے لوگوں کے انخلاء کا منصوبہ ممکنہ آتش فشانی کی وجہ سے نہیں بلکہ اس سے پہلے بنایا گیا تھا تاکہ ان لوگوں کو نومبر میں ہونے والی شدید ممکنہ برفباری سے بچانے کے لئے میں عارضی پناہ گاہیں فراہم کی جائیں۔

انہوں نے کہا کہ نومبر میں الائی کی وادی برفباری کی وجہ سے باقی علاقوں سے کٹ جاتی ہے اور وہاں تک پہنچنے کا ذریعہ صرف ہیلی کاپٹر ہی ہوتے ہیں۔ انہوں نے مذید کہا کہ کیونکہ وادی الائی میں زیادہ تر مکانات تباہ ہو چکے ہیں لہذا لوگوں کو عارضی پناہ گاہیں فراہم کی جا رہی ہیں۔

اس سے قبل جیولوجیکل سروے کے ایک اور ماہر تحسین اللہ خان نے دعویٰ کیا کہ آٹھ اکتوبر کو آنے والے زلزلے سے پہاڑ اپنی جگہ سے دو میٹر سے زائد سرک گئے ہیں جس سے آٹھ اکتوبر کو بڑے پیمانے پر تباہی ہوئی تھی۔