اعجاز مہر بی بی سی اردو ڈاٹ کام مظفرآباد

	حکومت کو پالیسی واضح کرنا ہوگی کہ قرض داروں سے کیسے پیش آیا جائے

تاہم کچھ بینکوں کی تباہ شدہ برانچیں اب بھی بند ہیں۔ کئی دن سے لوگ بینکوں کے بند ہونے کی وجہ سے پریشانی کا شکار تھے کیونکہ انہیں ضروریاتِ زندگی کے حصول کے لیے پیسے درکار تھے لیکن بینک بند ہونے کی وجہ سے وہ پیسے نہیں نکلوا سکتے تھے۔

سٹیٹ بنیک کے چیف مینیجر اے ڈی بٹ نے بی بی سی کو بتایا کہ مظفرآباد، باغ اور راولاکوٹ سمیت پاکستان کے زیرِ انتظام کشمیر کے کئی علاقوں میں بینکوں نے کام کرنا شروع کر دیا ہے۔

ان بینکوں کو ہدایت کی گئی ہے کہ فی الحال چھوٹے کھاتے داروں اور حکومتی محکموں کو امدادی کاموں کے لیے رقوم کی ادائیگی کی جائے۔ ساتھ ساتھ بینکوں کو یہ ہدایت بھی دی گئی ہے کہ وہ تنخواہ دار لوگوں کو اور پینش لینے والوں کو بھی رقم کی ادائیگی کرنا شروع کر دیں۔

چھوٹے کھاتے دار بینکوں کی بندش کی وجہ سے کافی پریشان تھے اور ان کا کہنا تھا کہ زلزلے کی تباہی کے بعد انہیں رقم کی فوری ضرورت تھی جو انہیں وقت پر نہیں ملی۔

سٹیٹ بینک کے چیف مینیجر نے ایک سوال کے جواب میں بتایا کہ مختلف بینکوں سے لوگوں کو مکانوں اور دکانوں کو گروی رکھنے کے بعد پانچ ارب روپے کے قرض دیئے گئے تھے لیکن اب زلزلے کے بعد جس میں متعدد املاک تباہ ہوگئیں ہیں، حکومت کو پالیسی واضح کرنا ہوگی کہ آیا یہ قرض معاف کیے جائیں گے یا قرض داروں سے یہ رقوم وصول کی جائیں گی۔

انہوں نے بتایا کہ مظفرآباد میں نیشنل بینک کی مرکزی برانچ زلزلے سے مکمل تباہ ہوگئی ہے۔ مختلف بینکوں میں عملے کے پندرہ ارکان زلزلے کے باعث ہلاک ہوئے جبکہ سات کھاتے دار بھی مارے گئے ہیں۔

اے ڈی بٹ نے بتایا کہ ملبے کے نیچے سے اب تک سترہ کروڑ روپے نقد اور سونا نکال لیا گیا ہے۔ تاہم کچھ بینک ملازمین نے کہا ہے کہ تباہ شدہ بینکوں کی برانچوں سے لاکھوں روپے اڑا لیے گئے ہیں لیکن انتظامیہ معاملے کو دبانے کی کوشش کر رہی ہے۔

سٹیٹ بینک کے چیف مینیجر نے بتایا کہ پاکستان کے زیرِ انتظام کشمیر کے تین اضلاع مظفرآباد، باغ اور راولاکوٹ میں میں نجی اور سرکاری بینکوں کی ایک سو کے قریب برانچیں ہیں جن میں سترہ مکمل طور پر تباہ ہوچکی ہیں جبکہ سات برانچوں کی عمارتوں کو نقصان پہنچا ہے۔ تاہم چودہ ایسی عمارتیں ہیں جن کے بارے میں کچھ پتہ نہیں چل سکا۔