برطانیہ میں بہت بڑی تعداد میں کشمیری رہتے ہیں اور سب اپنے عزیزوں کے لیے پریشان ہیں

برطانیہ میں پاکستان ہائی کمیشن نے تین ہوائی اڈوں پر ویزہ سروس شروع کر دی ہے۔

ہیتھرو، برمنگھم اور مانچسٹر کے ہوائی اڈوں پر لوگوں کو ہنگامی بنیادوں پر ویزے جاری کیے جا رہے ہیں۔

ہیتھرو پر پی آئی اے کے ایک اہلکار نے بتایا کہ سنیچر کی رات کو اکانومی کلاس میں پاکستان جانے کے خواہشمند افراد میں چالیس فیصد اور بزنس کلاس میں پندرہ فیصد اضافہ ہوا۔

پاکستان ہائی کمیشن کے ایک اہلکار نے بتایا کہ سنیچر کو انہوں نے ہوائی اڈے پر دس ویزے جاری کیے ہیں اور بہت سے لوگوں کو کمیشن کے دفتر میں ویزے دیئے گئے۔

ہیتھرو ہوائی اڈے پر ستائیس سالہ فیصل علی نے بتایا کہ ان کا اسلام آباد میں اپنے رشتہ داروں سے رابطہ ہو گیا ہے لیکن انہیں مظفر آباد میں اپنے جاننے والوں کی کوئی اطلاع نہیں۔ انہوں نے کہا کہ رابط نہ ہونا سب سے بڑا مسئلہ ہے۔

فیصل علی کے باون سالہ رشتہ دار اعجاز حسین نے بتایا کہ وہ بہت پریشان ہیں۔ انہوں نے کہا لوٹن میں بہت بڑی تعداد میں کشمیری رہتے ہیں اور سب اپنے عزیزوں کے لیے پریشان ہیں۔