مبشر زیدی بی بی سی اردو ڈاٹ کام، اسلام آباد

سپریم کورٹ نے اس بل کی بعض شقوں کو آئین سے متصادم قرار دیا ہے

سپریم کورٹ کے نو رکنی بنچ جس کی سربراہی چیف جسٹس افتخار چوہدری نے کی اپنے مختصر حکم میں کہا ہے کہ حسبہ بل کی کئی شقیں آئین سے متصادم ہیں۔

ان شقوں میں سیکشن دس، بارہ، تئیس، پچیس اور اٹھائیس شامل ہیں۔

حسبہ بل چودہ جولائی کو سرحد اسمبلی نے پاس کیا تھا۔ اس بل کے حق میں اڑسٹھ جبکہ مخالفت میں چونتیس ووٹ پڑے تھے۔

پاکستان کی بڑی سیاسی جماعتوں مسلم لیگ، پیپلز پارٹی، عوامی نیشنل پارٹی سمیت کئی جماعتیں اور انسانی حقوق کی تنظیمیں اس بل کی سخت مخالفت کر رہی تھیں جبکہ دینی جماعتوں کے مطابق یہ قانون صوبہ سرحد، جہاں دینی جماعتوں کے اتحاد کی حکومت ہے، صوبے میں شریعت کے نفاذ میں مددگار ثابت ہو گا۔

صدر جنرل پرویز مشرف کی جانب سے پندرہ جولائی کو یہ ریفرنس آئین کے آرٹیکل ایک سو چھیاسی کے تحت دائر کیا گیا تھا۔ اس ریفرنس میں سات سوالات کئے گئے تھے اور عدالت سے رائے طلب کی گئی تھی۔

صدر نے معلوم کیا تھا کہ حسبہ بل آئین یا اس کی کسی شق سے متصادم تو نہیں ہے اور کیا اس بل کو قانونی حیثیت مل جانے کے بعد آئین میں دیے گئے بنیادی انسانی حقوق سلب تو نہیں ہونگے۔

ریفرنس میں یہ سوال بھی اٹھایا گیا تھا کہ آیا اس بل سے متبادل عدالتی نظام کا قیام تو نہیں ہوگا اور لوگوں کی انصاف سے پہنچ دور تو نہ ہوگی۔

عدالت سے پوچھا گیا تھا کہ ان سات سوالات یا کسی ایک سوال کا جواب ہاں میں ہونے کی صورت میں کیا گورنر اس بل پر دستخط کرنے کے لیے پابند ہیں؟

حسبہ بل کی سماعت کے موقع پر نئی وردیوں میں خواتین پولیس سپریم کورٹ کے باہر مستعد

انہوں نے بی بی سی سے بات کرتے ہوئے کہا کہ اس بل کی اسی فیصد شقوں کو سپریم کورٹ نے آئین کے مطابق قرار دیا ہے اور ہم سمجھتے ہیں کہ یہ فیصلہ ہمارا حق میں ہوا ہے۔