ریاض سہیل بی بی سی اردو ڈاٹ کام، کراچی

صدر کی جانب سے یہ ریفرنس آئین کے آرٹیکل ایک سو چھیاسی کے تحت دائر کیا گیا ہے

یہ ریفرنس سپریم کورٹ کی کراچی رجسٹری میں دائر کیا گیا ہے جس کی ابتدائی سماعت چیف جسٹس آف پاکستان جسٹس افتخار محمد چوہدری، جسٹس حامد علی مرزا، جسٹس فقیر محمد کھوکر، جسٹس محمد جاوید بٹر، جسٹس سعد سید اشہد پر مشتمل فل بنچ نے کی۔

عدالت میں اٹارنی جنرل مخدوم علی خان نے دلائل دیے۔ ان کا کہنا تھا کہ یہ بل آئین سے متصادم ہے اور اس سے متبادل عدالتی نظام قائم ہو جائےگا۔ عدالت نے ابتدائی دلائل سننے کے بعد سماعت پچیس جولائی تک ملتوی کردی۔

سپریم کورٹ نے حسبہ بل پر حکومت پاکستان اور صوبائی حکومتوں کا موقف سننے کے لیے اٹارنی جنرل، چاروں صوبوں کے ایڈووکیٹ جنرلز اور سرحد اسمبلی کے سیکرٹری کو طلب کیا ہے جبکہ آئندہ سماعت اسلام آباد میں ہوگی۔

صدر کی جانب سے یہ ریفرنس آئین کے آرٹیکل ایک سو چھیاسی کے تحت دائر کیا گیا ہے ۔ اس ریفرنس میں سات سوالات کئے گئے ہیں اور عدالت سے رائے طلب کی گئی ہے۔

صدر نے معلوم کیا ہے کہ حسبہ بل آئین یا اس کی کسی شق سے متصادم تو نہیں ہے اور کیا اس بل کو قانونی حیثیت مل جانے کے بعد آئین میں دیے گئے بنیادی انسانی حقوق سلب تو نہیں ہونگے۔

ریفرنس میں یہ سوال بھی اٹھایا گیا ہے کہ آیا کہ اس بل سے متبادل عدالتی نظام کا قیام تو نہیں ہوگا اور لوگوں کی انصاف سے پہنچ دور تو نہ ہوگی۔

عدالت سے پوچھا گیا ہے کہ ان سات سوالات یا کسی ایک سوال کا جواب ہاں میں ہونے کی صورت میں کیا گورنر اس بل پر دستخط کرنے کے لیے پابند ہیں؟

واضح رہے کہ صوبہ سرحد میں ایم ایم اے حکومت نے اسمبلی میں اکثریتی رائے سے حسبہ بل منظور کر وایا ہے جس کے بارے میں کہا جارہا ہے کہ مجلس عمل اس بل کے ذریعے اپنے نفاذ شریعت کے ایجنڈے کو پورا کرنا چاہ رہی ہے۔