ریاض سہیل کراچی

سندھ اسمبلی فائل فوٹو

وزیر اعلی سندھ ارباب غلام رحیم کی صدارت میں بدھ کو منعقدہ ہونے والے ایک اجلاس میں مختلف محکموں کےمطالبات، ضروریات اور ترجیحات پر غور کیا گیا۔

اجلاس کی تفصیلات کے بارے میں سندھ کے وزیر خزانہ سید سردار احمد نےبتایا کہ اس بجٹ میں ترقیاتی کاموں کے لیے تئیس ارب روپے رکھے جائیں گے۔گزشتہ سال یہ رقم اٹھارہ ارب روپے تھی جس میں سے اب تک تیرہ ارب روپے مہیا کیے جا چکے ہیں۔

آئندہ بجٹ میں مختلف شعبوں کی ترجیحات کے بارے میں انہوں نے کہا کہ سب سے زیادہ اہمیت تعلیم کو دی جا رہی ہے اور امن وامان اس فہرست میں دوسرے نمبر پر، سڑکیں تیسرے نمبر پر اور صحت چوتھے نمبر پر ہے۔

قومی مالیاتی ایوارڈ کے بارے میں انہوں نے بتایا کہ انہوں نے سندھ کی نئی تجاویز کے حوالے سے تینوں صوبوں کے وزرائے خزانہ کو خطوط لکھے ہیں۔ انہوں نے پنجاب کے وزیر خزانہ کے اس الزام کو مسترد کیا کہ یہ خط قانون کی خلاف ورزی ہے۔ انہوں نے واضح کیا کہ یہ خط آئین کی دفعہ ایک سو ساٹھ کے مطابق ہے۔

سردار احمد نے امید ظاہر کی کہ مالی وسائل کی تقسیم کا معاملہ جلد طے ہو جائےگا۔ تاہم انہوں نے کہا کہ مستقبل قریب میں قومی مالیاتی کمیشن کی کوئی میٹنگ متوقع نہیں ہے۔

وزارت دفاع پر سندھ کی واجبات کے بارے میں انہوں نے بتایا کہ یہ رقم دس ارب روپے بنتی ہے۔ ہم نے کئی مرتبہ خطوط لکھ ہیں لیکن معاملہ آگے نہیں بڑھ سکا ہے۔

صوبائی وزیر خزانہ نے کہا کہ وزارت دفاع کا موقف ہے کہ زمین کے ریٹ زیادہ لگائےگئے ہیں لیکن حقیقت یہ ہے کہ یہ مارکیٹ ریٹ سے بھی کم ہیں۔ انہوں نے کہا پہلے زمین کے ریٹ طے کرنے پڑیں گے۔