نیوز ویک

امریکی جریدے نیوز ویک کے مطابق امریکی تفتیش کار قیدیوں کو ذہنی اذیت پہنچانے اور ان کی اعصاب شکنی کے لیے قرآن کو بیت الخلا میں رکھ دیتے تھے اور ایک بار ایسا بھی ہوا کے قرآن کو بہا بھی دیا گیا۔

پاکستانی دفترِ خارجہ نے نیوز ویک کی اس رپورٹ پر تبصرہ کرتے ہوئے کہا ہے کہ یہ زیرحراست افراد کے ساتھ یہ رویہ انتہائی قابلِ اعتراض اور افسوسناک ہے۔

دفتر خارجہ کے بیان میں کہا گیا ہے کہ حکومتِ پاکستان ان اطلاعات کی مذمت کرتی ہے اور مطالبہ کرتی ہے کہ ان کی تحقیق کی جائے اور ذمہ داروں کے خلاف قانون کے مطابق کارروائی کی جائے۔

نیوزویک میں یہ رپورٹ اپنی تازہ ترین اشاعت میں ’ایک مقدس کتاب کا بیت الخلاء سے بہایا جانا‘ کے عنوان سے شائع کی گئی ہے۔

واضح رہے کہ امریکہ نے گوانتاناموبے میں پانچ سو بیس افراد کو نظر بند رکھا ہوا ہے۔ افغانستان اور پاکستان سے ان لوگوں کو طالبان وار القاعدہ سے مشتبہ تعلق کی بنا پر گرفتار کیا گیا تھا۔