ہارون رشید
بی بی سی اردو ڈاٹ کام، پشاور |  |
|  اے این پی ان انتخابات میں غیر جانبدار رہے گی |
صوبہ سرحد میں انیس تاریخ کو سینٹ کی ایک خالی نشست کے لیے ہونے والے انتخابات میں عوامی نیشنل پارٹی نے غیرجانبدار رہتے ہوئے حصہ نہ لینے کا فیصلہ کیا ہے۔ صوبائی دارالحکومت پشاور میں جماعت کے دفتر باچا خان مرکز سے جاری ایک بیان کے مطابق یہ فیصلہ جماعت کی اعلی کمان نے حالات کا جائزہ لینے کے بعد کیا ہے۔ عوامی نیشنل پارٹی کے صوبائی آرگنائزر اور سرحد اسمبلی میں پارلیمانی رہنما بشیر احمد بلور کے مطابق اس فیصلے کے بعد جماعت سے تعلق رکھنے والے اراکین صوبائی اسمبلی اب ووٹنگ میں حصہ نہیں لیں گے۔ ان کا کہنا تھا کہ حزب اختلاف کے اراکین نہ تو کسی ایک امیدوار پر متفق ہوسکے ہیں اور نہ اے این پی حکمراں اتحاد متحدہ مجلس عمل کے امیدوار کو ووٹ کا حقدار سمجھتی ہے۔ عوامی نیشنل پارٹی کے رہنما کا کہنا تھا کہ حزب اختلاف کو ایک امیدوار پر متفق ہو جانا چاہیے تھا لیکن مختلف خیالات کی مالک پارٹیوں نے ایسا نہیں کیا جس کی وجہ سے ان کی جماعت نے یہ قدم اٹھایا ہے۔ ایوان بالا کی یہ نشست کمانڈر خلیل الرحمان کو گورنر سرحد بنائے جانے سے خالی ہوئی تھی۔ اس پر پہلے یہ انتخاب اس ماہ کی تیرہ تاریخ کو ہونے تھے لیکن ریٹرنگ افسر کی اچانک علالت کے بعد موخر کر دیے گئے تھے۔ اب یہ انتخاب انیس تاریخ کو ہوگا۔ اس ایک نشست کے لیے اس وقت میدان میں پانچ امیدوار کھڑے ہیں۔ ان میں فیورٹ ایم ایم اے کے قاری محمد عبداللہ ہیں جبکہ دیگر امیدواروں میں ایم ایم اے کے ہی ناراض رکن پیر محمد خان، مسلم لیگ کی خاتون رکن نگہت اورکزئی، پیپلز پارٹی پارلیمنٹرین کے سید قمر عباس اور نجم الدین شامل ہیں۔ صوبے میں حکمراں اتحاد متحدہ مجلس عمل خیال ہے کہ وہ یہ نشست باآسانی جیت جائے گی۔ | 
یہ صفحہ دوست کو ای میل کیجیئے
پرِنٹ کریں
