علی سلمان بی بی سی اردو ڈاٹ کام، لاہور

آصف زرداری نے سنیچر کو داتا دربار جانے کا پروگرام بھی ملتوی کر دیا تھا

پنجاب کے وزیر اعلی چودھری پرویز الہی نے آصف زرداری کی حراست اور لاہور کے بلاول ہاؤس میں نظر بندی کے بعد ایک پریس کانفرنس کی تھی جس میں انہوں نے آصف زرداری کی نظر بندی کی تردید کی تھی اور کہا تھا کہ گرفتار کارکنوں کو بھی رہا کر دیا جائے گا۔

وزیر اعلی کی پریس کانفرنس شروع ہونے سے چند لمحے قبل آصف زرداری کی رہائش گاہ کا محاصرہ ختم کر دیا گیا تھا اور رات گئے کارکنوں اور رہنماؤں کی رہائی کا آغاز ہوگیا۔

تھا نہ سرور روڈ کے ڈیوٹی محرر نے بتایا کہ حوالات میں پیپلز پارٹی کے چالیس سے زائد رہنما اور کارکن بند تھے اور تمام کو رہا کر دیا گیا۔

لاہور کے پرانے ائر پورٹ اور بلاول ہاؤس کے نزدیک واقع تھانہ سرور روڈ سے رہائی پانے والوں میں پیپلز پارٹی پارلیمنٹرین کے سیکرٹری جنرل جہانگیر بدر ، پیپلز پارٹی پارلیمنٹرین پنجاب کے صدر قاسم ضیاء، لاہور کے صدر عزیزالرحمان چن، لاہور کے جنرل سیکرٹری سمیع اللہ خان، سندھ سے تعلق رکھنے والے سابق وفاقی وزیر عبدالستار بچانی، سابق وزیراعلی سندھ قائم علی شاہ بھی شامل ہیں۔

ڈیوٹی افسر نے بتایا کہ ان میں سے کسی کے خلاف ابھی کوئی مقدمہ درج نہیں ہوا تھا۔

ایک پولیس اہلکار نے اپنا نام ظاہر نہ کرنے کی شرط پر بتایا کہ پہلے مرحلےپر جب صرف قائدین کو رہا کیا گیا اور حوالات سے باہر جانے کی اجازت دی گئی تو انہوں نے جانے سے انکارکردیا اور کہا کہ وہ اس وقت تک باہر نہیں جائیں گے جب تک تھانے میں قید تمام کارکنوں کو بھی رہا نہیں کر دیا جاتا جس پر کچھ دیر بعد ان کے ہمراہ کارکنوں کو بھی رہا کر دیا گیا۔

پولیس ذرائع کاکہنا ہے کہ ابھی صرف ان افراد کو رہا کیا گیا ہے جو سنیچر کو ہی گرفتار ہوئے تھے اور ان کے خلاف کو ئی مقدمہ بھی درج نہیں ہوا تھاتاہم پہلے سے گرفتار جن افراد کے خلاف مقدمات درج ہیں انہیں جیل بھجوادیا گیا ہے۔

بے نظیر بھٹو کے ترجمان منور انجم کو بھی رہائی مل گئی ہے لیکن نظر بند پیپلز پارٹی پارلینمٹرین کے سربراہ مخدوم امین فہیم کی رہائی کی تصدیق نہیں ہوسکی۔

ان کی طرح پیپلز پارٹی کے متعدددیگر افراد کی رہائی کی تصدیق نہیں ہوسکی۔ آصف زرداری نے اپنی پریس کانفرنس میں بتایا تھا کہ ناہید خان ، ساجدہ میر، شیریں رحمان اور صفدر عباسی کو گاڑی میں ڈال کر کسی دور دراز علاقے میں لے جایا گیا ہے اس کے بعد ان کے بارے میں کوئی اطلاع نہیں آئی۔

آصف زرداری نے سنیچر کو داتا دربار جانے کا پروگرام ملتوی کر دیا تھا اور اعلان کیا کہ پارٹی کارکنوں کی رہائی تک وہ داتا دربار نہیں جائیں گے۔