اسد علی چودھری بی بی سی اردو ڈاٹ کام، فیصل آباد

فیصل آباد کا شمار ان دو یا تین شہروں میں ہوتا ہے جہاں یرقان کا مسئلہ سب سے زیادہ سنگین ہے۔

فیصل آباد سے تعلق رکھنے والے وفاقی وزیر مشتاق چیمہ نے اتوار کے روز بی بی سی اردو سروس کی طرف سے منعقد کی جانے والی سنگت میں بات کرتے ہوئے کہا کہ ہیپٹائٹس سی کے سب سے زیادہ مریض اسی شہر میں ہیں۔

اس سے قبل شہر کے الائیڈ ہسپتال میں پیتھالوجوکل لیبارٹری کے سربراہ ڈاکٹر اکرام الحق نے کہا تھا کہ فیصل آباد کا شمار ان دو یا تین شہروں میں ہوتا ہے جہاں یرقان کا مسئلہ سب سے زیادہ سنگین ہے۔

ڈاکٹر اکرام نے بتایا کہ یرقان کی موجودگی کے ساتھ ساتھ زیادہ خطرناک بات اس مرض کی تشخیص نہ ہونا ہے۔

انہوں نے کہا کہ بہت سے مریض تشخیص نہ ہونے کی وجہ سے خون دیتے ہیں، ازدواجی تعلقات قائم کرتے ہیں جس سے یہ مرض پھیلتا چلا جاتا ہے۔

ڈاکٹر اکرام نے بتایا کہ دو سال پہلے تک ان کی لیب میں ٹیسٹ کے لیے آنے والے ایک سو مریضوں میں سے تیس یا چالیس یرقان کے لیے پازیٹو نکلتے تھے لیکن گزشتہ سال نئی مشینوں کی آمد کے بعد سے یہ تعداد کم ہو گئی ہے۔

انہوں نے اس امکان کا اعتراف کیا کہ نئی مشینوں کے معیاری نہ ہونے کی وجہ سے بہت سے یرقان کے مریضوں کی نشاندہی نہیں ہو رہی اور وہ دیگر افراد کے ساتھ تعلق میں رہنے کی وجہ سے یرقان کے پھیلاؤ کا باعث بن رہے ہیں۔

انہوں نے کہا فیصل آباد ایک صنعتی شہر ہے جہاں مزدور کچی بستیوں میں رہتے ہیں اورجہاں بیماری کے تیزی سے پھیلنے کا خطرہ رہتا ہے۔

الائیڈ ہسپتال کے میڈیکل سپرینٹنڈنٹ نے کہا کہ یہ کہنا غلط ہے کہ غیر معیاری مشینیں خریدی گئی ہیں۔ انہوں نے کہا کہ تمام مشینری حکومت کی منظور شدہ فرموں سے خریدی جاتی ہے۔

یرقان اور صاف پانی

بی بی سی اردو سرور کی سنگت میں شریک شہر کے ایک رکن قومی اسمبلی اور صنعتکار ریحان لطیف نے تسلیم کیا کہ شہر میں فوری طور پر صاف پانی کی فراہمی کے انتظام کی ضرورت ہے۔

انہوں نے اس تنقید کو رد کیا کہ صنعتکاروں نے فیصل آباد کی بہتری میں حصہ نہیں لیا۔ اس سلسلے میں انہوں نے نیوروسرجری وارڈ، لیور سنٹر اور دیگر کئی کاوشوں کا ذکر کیا جو صنعتکاروں نے شہریوں کو مختلف سہولتیں فراہم کرانے کے لیے کی ہیں۔

بیماری تیزی سے پھیلنے کا خطرہ ہے

ریحان لطیف نے کہا کہ ڈبلیو ٹی او پر دستخط کے بعد صنعتی ترقی کے ساتھ ساتھ ماحولیات اور سماجی پہلوؤں کو مد نظر رکھنا صنعتکاروں کی قانونی ذمہ داری ہے۔

یرقان کی مریضہ

الائیڈ ہسپتال میں ناک میں خون بنے کی شکایت لے کر آنے والی ایک مریضہ سکینہ کے خون کے ٹیسٹ سے معلوم ہوا ہے کہ وہ یرقان کے مرض میں مبتلا ہے۔

ڈاکٹر اس کو بیماری نہیں سمجھا پا رہے تھے۔ اس نے بتایا کہ اس کا خاوند کچھ نہیں کرتا۔ ان کی ایک ایکڑ زمین ہے اور بس گزارا ہو جاتا ہے۔

اس سے بات چیت کے دوران ساتھ والے بستر سے ایک مریض نے اٹھ کر کہا کہ اسے نہ بتانا ہی بہتر ہے کیو نکہ دوسری صورت میں یہ خوف سے ہی گزر جائے گی یا کم سے کم بلڈ پریشر کا شکار ہو جائے گی۔

اس نے کہا کہ وہ دوائی لے کر گھر چلی جائے گی۔ سکینہ نے کہا کہ ناک سے خون ہی تو بہتا ہے ٹھیک ہو جائے گا۔