اعجاز مہر بی بی سی اردو ڈاٹ کام، اسلام آْباد

وزیرِخارجہ نے سفیروں کو بتایا کہ حکومت مذاکرات کے عمل کو آگے بڑھانا چاہتی ہے

دفترخارجہ کے جاری کردہ ایک بیان میں بتایا گیا ہے کہ یورپی یونین، صنعتی ممالک یعنی’جی ایٹ‘ اور اقوامِ متحدہ کی سلامتی کونسل کے مستقل رکن ممالک یعنی ’پی فائیو‘ کے سفیروں کی درخواست پر اس بریفنگ کا اہتمام کیا گیا۔

بیان میں بھارت سے اب تک کے مذاکرات میں ہونے والی پیش رفت کی مکمل تفصیلات تو نہیں بتائی گئیں البتہ اتنا کہا گیا ہے کہ خورشید محمود قصوری نے اپنے بھارتی ہم منصب نٹور سنگھ کے ساتھ حالیہ ملاقات میں ہونے والی بات چیت اور خصوصی پرمٹ پر سرینگر سے مظفرآباد تک بس سروس کی بحالی کے متعلق معاہدے کے بارے میں سفیروں کو مطلع کیا۔

حکام کے مطابق وزیرِخارجہ نے سفیروں کو بتایا کہ صدر جنرل پرویز مشرف اور حکومت مذاکرات کے عمل کو آگے بڑھانا چاہتی ہے۔

ان کے مطابق پاکستان اپنے ہمسایہ ملک بھارت کے ساتھ کشمیر سمیت تمام مسائل بات چیت کے ذریعے پرامن طور پر حل کرنے کی کوشش کر رہا ہے۔

متعلقہ سفیروں نے تفصیلی بریفنگ دینے پر وزیرخارجہ کا شکریہ ادا کیا اور حالیہ بات چیت میں ہونے والی مثبت پیش رفت پر خوشی کا اظہار کیا۔

دریں اثناء وزیرخارجہ نے ایک نجی ٹی وی چینل کے ساتھ بات چیت میں اس بات کا اقرار کیا کہ سرینگر سے مظفرآباد تک بس سروس کی بحالی پر بیشتر معاملات پراتفاق پس پردہ سفارتکاری کے ذریعے ہوچکا تھا جبکہ ان کے مطابق انہوں نے کچھ معاملات باضابطہ مذاکرات سے ایک دن قبل ایک غیر رسمی ملاقات میں طے کیے تھے۔