عدنان عادل
بی بی سی اردو ڈاٹ کام، لاہور |  |
|  مالیاتی ادارے ڈرادھمکا کر اور زبردستی کرکے واجب الادا قرضہ وصول نہیں کر سکتے |
لاہور ہائی کورٹ نے کہا ہے کہ مقروض کی وفات کی صورت میں بنک اور مالیاتی ادارے اس کے ورثاء سے قرضہ کی رقم وصول نہیں کرسکتے۔ اس فیصلے کے مطابق کوئی وارث اپنے متوفی والد کے قرضہ کی ادائیگی کا ذاتی طور پر ذمہ دار نہیں ہوگا۔ ہائی کورٹ کے جج جسٹس میاں حامد فاروق نے ساہیوال کے نذیر احمد کی رٹ درخواست منظور کرتے ہوئے ہاؤس بلڈنگ فنانس کارپوریشن کو حکم دیا کہ وہ درخواست گذار سے اس کے مرحوم والد کے قرضہ کی مد میں آٹھ سال پہلے وصول کی جانے والی پچاس ہزار روپے کی رقم واپس کرے۔ جج نے کہا کہ مالیاتی ادارے ڈرادھمکا کر اور زبردستی کرکے واجب الادا قرضہ وصول کریں گے تو یہ غیرقانونی قدم ہوگا اور ان اداروں کو یہ رقم متعلقہ شخص کو واپس کرنا ہوگی۔ تاہم عدالت عالیہ نے کہا کہ مالیاتی ادارے مرنے والے کی رہن شدہ جائیداد کو بیچ کر قرضہ کی رقم وصول کرسکتے ہیں لیکن اس کے لیے انہیں قانونی راستہ اختیار کرنا ہوگا۔ عدالت عالیہ نے یہ بھی کہا کہ مالیاتی ادارے کسی مقروض کے ضامن سے اس کے بیان حلفی کی بنیاد پر بھی رقم وصول کرنے کے مجاز نہیں ہیں۔ جج نے کہا کہ ضامن ایسے بیان حلفی سے منحرف ہوجائے تو اس کی کوئی قانونی حیثیت نہیں ہوگی۔ عدالت کے حکم کے مطابق کسی ضامن سے صرف اسی صورت میں قرضہ کی رقم بازیاب کرائی جاسکتی ہے جب اس نے دستاویزاتی ضمانت جاری کی ہو جس میں اس نے واضح کیا ہو کہ مقروض نے متعلقہ رقم واپس نہ کی تو وہ متعلقہ رقم واپس کرنے کا ذمہ دار ہوگا۔
| 
یہ صفحہ دوست کو ای میل کیجیئے
پرِنٹ کریں
