 |  صد مشرف پہلے پاکستانی حکمران ہیں جنہوں نے برازیل کا دورہ کیا ہے۔ |
صدر پرویز مشرف لاطینی امریکہ کے دورے کے پہلے مرحلے میں برازیل پہنچ گئے ہیں جہاں وہ برازیل کے صدر سے ملاقات کریں گے۔ توقع ہے کہ برازیل کے دارالحکومت میں صدر لوئیز اناکیو لولا سے ہونے والی اس ملاقات میں صدر مشرف دونوں ممالک کے تعلقات کی بہتری اور تجارت کے فروغ پر بات کریں گے۔ صدر مشرف کا کہنا ہے’مجھے لاطینی امریکہ اور پاکستان کے تعلقات بہتری کی جانب مائل نظر آتے ہیں۔ مجھے محسوس ہوتا ہے کہ لاطینی امریکہ سے تعلقات بہتر بنانے پر پہلے زیادہ توجہ نہیں دی گئی۔ میں وہاں جانے والا پہلا پاکستانی رہنما ہوں۔ مجھے محسوس ہوتا ہے کہ اقتصادی اور تجارتی شعبوں میں لاطینی امریکہ خصوصاً برازیل کے ساتھ روابط بہت خوش آئند ہیں‘۔ برازیل جانے سے پہلے انہوں نے سینیگال میں بھی مختصر قیام کیا تھا۔ صدر مشرف کے ہمراہ اس دورے پر خارجہ، تجارت اور نجکاری کے شعبوں کے وزراء کے علاوہ تاجروں کا ایک گروپ بھی موجود ہے۔ یہ گروپ برازیل کے تجارتی مرکز ساؤ پالو بھی جائے گا جہاں تجارت سے وابستہ اہم شخصیات سے ان کی ملاقات متوقع ہے۔ یہ توقع بھی ہے کہ یہ افراد چار دستاویزات پر دستخط کریں گے جو منشیات کا کاروبار، زرعی و صنعتی ہائی جین، ویزا کی سہولیات اور آزاد سیاسی انتخابات کے طریقہ کار سے متعلق ہیں۔ پاکستان اور برازیل کے درمیان اب تک محدود پیمانے پر تجارت ہوتی آئی ہے۔ سن 2003 میں دونوں ممالک کے درمیان 50 ملین ڈالر کی تجارت کی گئی تھی۔ برازیل نے ابھی تک اقوام متحدہ کی سلامتی کونسل میں مستقل نشست حاصل کرنے کی اپنی مہم میں پاکستان سے حمایت نہیں مانگی ہے۔ اسلام آباد کے لیے برازیل کے سفیر فاستو گوداؤ کا کہنا ہے کہ برازیل پاکستان کے سمندروں میں تیل کی تلاش اور ملک میں نجکاری میں دلچسپی رکھتا ہے۔ اطلاعات کے مطابق مشرف یکم اور دو دسمبر کو ارجنٹائن کا دورہ کریں گے، دسمبر تین اور چار میکسیکو میں گزاریں گے اور چار دسمبر کو ہی واشنگٹن پہنچیں گے جس کے بعد وہ لندن اور پیرس کا دورہ بھی کریں گے۔ | 
یہ صفحہ دوست کو ای میل کیجیئے
پرِنٹ کریں
