عدنان عادل بی بی سی اردو ڈاٹ کام ، لاہور

شدید دھند کی وجہ سے ٹریفک کو جی ٹی روڈ پر منتقل کر دیا گیا ہے

موٹروے پولیس کے اسسٹنٹ سپرنٹنڈنٹ پولیس ناصر مختار نے بی بی سی کو بتایا کہ لاہور اوراسلام آباد سے موٹروے پر گاڑیوں کو موٹر وے کے بجاۓ جی ٹی روڈ استعمال کرنے کے لیے کہا گیا ہے۔ ان کا کہنا تھا کہ صبح گیارہ بجے اتنی دھند تھی کہ بیس میٹر سے آگے کچھ نطر نہیں آرہا تھا اور رات کو ڈیڑھ فٹ سے آگے کچھ نطر نہیں آتا۔

گزشتہ رات نصف شب کے قریب لاہور اسلام آباد موٹروے پر شدید دھند کی وجہ سے مختلف مقامات پر کم سے کم چودہ گاڑیاں آپس میں ٹکرا گئیں تھیں۔ جس سے موٹروے پولیس کے مطابق دو افراد ہلاک اور متعدد افراد زخمی ہوگۓ اور سڑک ٹریفک کے لیے جمعہ کی رات گیارہ بجے کے بعد ہفتہ کی صبح سات بجے تک کے لیے بند کردی گئی تھی۔

موٹروے پولیس نے بی بی سی کو بتایا کہ دھند کی وجہ سے رات گیارہ بجے کے قریب خانقاہ ڈوگراں کے قریب آٹھ گاڑیاں اور بھیرہ کے قریب چھ گاڑیاں آپس میں ٹکراگئیں۔ ان کا کہنا تھا کہ گاڑیوں کی رفتار کم تھی اس لیے زیادہ جانی نقصان نہیں ہوا۔

پولیس نے بتایا کہ موٹر وے پر دھند کی وجہ سے شام سے لے کر صبح نو بجے تک ڈیڑھ فٹ سے آگے کچھ نظر نہیں آ رہا۔ کل رات سے آج صبح تک پولیس گاڑیوں کو موٹر وے سے موڑ کر جی ٹی روڈ کی طرف بھیج رہی تھی۔