ہارون رشید بی بی سی اردو ڈاٹ کام، پشاور

کوہستان کے علاقے دوبیر میں پولیس نے بتایا کہ حادثہ صبح ساڑھے چار بجے کے قریب اس وقت پیش آیا جب مسافروں سے بھری بس شاہراہ قراقرم پر دوبیر پل پار کرتے ہوئے دریا میں جا گری۔

بس سکردو سے راولپنڈی جا رہی تھی۔ پولیس کا کہنا ہے کہ سات لاشیں برآمد کر لی گئی ہیں۔ حادثے میں چھتیس افراد زخمی بھی ہوئے ہیں۔ حادثے کی وجہ معلوم نہیں ہوسکی ہے۔

شاہراہِ قراقرم چٹیل پہاڑوں کو کاٹ کر بنائی گئی ہے جس کے سنگم میں ٹھاٹھیں مارتا ہوا دریائے سندھ کئی مقامات پر سینکڑوں فٹ گہرائی میں بہتا ہے۔ اس شاہراہ پر گاڑی چلانا انتہائی مہارت کا کام ہے۔

پولیس بس میں سوار مسافروں کی درست تعداد معلوم کرنے کی کوشش کر رہی ہے۔ البتہ زخمی مسافروں کے بقول بس مکمل طور پر بھری ہونے کے علاوہ اس کی چھت پر بھی چند افراد سوار تھے۔

بس کو دریا سے نکالنے کی کوششیں جاری ہیں۔ اس مقصد کے لئے فرنٹیر ورکس آرگنائزیشن کی مدد لی جا رہی ہے جس کی ذمہ داریوں میں اس شاہراہ کو ٹریفک کے لئے کھلا رکھنا بھی شامل ہے۔