اعجاز مہر بی بی سی اردو ڈاٹ کام،اسلام آباد

صدر جنرل پرویز مشرف نے واضح طور پر کہا تھا کہ کنٹرول لائن کو مستقل سرحد بنانے کی بھارتی تجویز پاکستان کو قابل قبول نہیں۔

البتہ کشمیری رہنماؤں کو پاکستان آنے کی اجازت دینے کے متعلق بھارت کے وزیر داخلہ کے بیان کا انہوں نے خیر مقدم کیا۔

پیر کے روز ہفتہ وار بریفنگ کے موقع پر ایک سوال کے جواب میں انہوں نے سرحد پار شدت پسندی کے متعلق بھی بھارت کے الزامات کو رد کیا اور کہا کہ بھارت کے رہنماؤں کو سوچنا چاہیے کہ وہ کیا کہہ رہے ہیں؟

ترجمان کے مطابق ’ایک ہفتے بھارت والے کہتے ہیں کہ سرحد پار شدت پسندی میں کمی ہوئی ہے اور دوسرے ہفتے کہتے ہیں کہ اس میں اضافہ ہوگیا ہے‘۔

بریفنگ کے دوران کنٹرول لائن کو مستقل سرحد بنانے کے متعلق الطاف حسین کے بیان کے بارے میں سوال کے جواب میں مسعود خان نے کہا ’جہاں تک کنٹرول لائن کو مستقل یا عارضی سرحد بنانے کا سوال ہے وہ مذاکرات اور بحث طلب معاملہ ہے، پاکستان اور بھارت جامع مذاکرات کر رہے ہیں اور کشمیر کے حل کے لیے تمام پہلوؤں پر بحث کی جا رہی ہے،۔

لیکن بریفنگ ختم ہونے کے بعد انہوں نے وضاحت کرتے ہوئے اپنے بیان کردہ موقف کے برعکس موقف اختیار کیا اور کہا کہ اصل میں وہ یہ کہنا چاہتے ہیں کہ پاکستان کو کنٹرول لائن کی بنیاد پر کشمیر کا کوئی بھی حل قابل قبول نہیں ہوگا۔ انہوں نے کہا کہ وہ سمجھتے ہیں کہ’سٹیٹسکو، ایک مسئلہ ہے، حل نہیں۔

یاد رہے کہ کچھ دن قبل پاکستان کے صدر جنرل پرویز مشرف نے بھی واضح طور پر کہا تھا کہ کنٹرول لائن کو مستقل سرحد بنانے کی بھارتی تجویز پاکستان کو قابل قبول نہیں۔

ترجمان نے کہا کہ پاکستان کا ہمیشہ سے اصرار رہا ہے کہ کشمیریوں کو بھی مذاکرات میں شامل کیا جائے اور مسئلہ کشمیر، کشمیریوں کی خواہش کے مطابق حل کیا جائے۔انہوں نے کہا کہ دونوں ممالک کے نمائندوں کو متضاد بیان دینے سے گریز کرنا چاہیے کیونکہ مسئلہ کے حل کی سنجیدہ کوششیں ہورہی ہیں۔

امریکی نائب وزیر خارجہ رچرڈ آرمیٹیج کے دورے کے متعلق انہوں نے بتایا کہ وہ منگل کو پاکستانی رہنماؤں سے ملاقات کریں گے اور دہشت گردی کے خلاف جنگ میں تعاون، پاک بھارت مذاکرات کی پیش رفت اور پاک امریکہ دو طرفہ معاملات کے متعلق بات چیت کریں گے۔

ایک سوال پر ترجمان نے بتایا کہ پاکستان، امریکہ سے ایف سولہ لڑاکا طیارے اور دیگر فوجی ساز و سامان حاصل کرنا چاہتا ہے اور اس ضمن میں دونوں ممالک کے درمیاں بات چیت چل رہی ہے۔تاہم انہوں نے تفصیلات نہیں بتائیں اور کہا کہ دونوں ممالک کے دفاع کے متعلق مشاورت کے گروپ کے آئندہ اجلاس میں یہ معاملہ زیر غور آئے گا۔