اعجاز مہر بی بی سی اردو ڈاٹ کام، اسلام آباد

ان پر الزام تھا کہ انہوں نے بطور سپیکر قومی اسمبلی اختیارات کا مبینہ طور پر غلط استعمال کرتے ہوئے تین سو کے لگ بھگ لوگوں کو قواعد کے خلاف ملازمتیں دی تھیں۔

راولپنڈی کی احتساب عدالت کے جج منظور حسین ملک کی جانب سے جب سزا سنائی گئی اس وقت آصف علی زرداری بھی عدالت میں اپنے ایک مقدمے کے سلسلے میں موجود تھے۔

یوسف رضا گیلانی نے بی بی سی اردو ڈاٹ کام سے بات کرتے ہوئے کہا کہ انہیں ایسے ہی فیصلے کی توقع تھی۔ انہوں نے الزام لگایا کہ احتساب عدالتیں ایک فوجی جرنیل کی سربراہی میں قائم احتساب بیورو کی ماتحت ہیں۔

یوسف رضا گیلانی کو کچھ عرصہ پہلے ایک مختلف مقدمے میں سرکاری رہائش گاہ کے غیر قانونی استعمال اور ٹیلی فون کی سہولت کے غلط استعمال کے الزامات میں پانچ سال سزا سنائی گئی تھی۔

اس سزا کے خلاف انہوں نے لاہور ہائی کورٹ میں اپیل کر رکھی ہے اور عدالت عالیہ نے انہیں ضمانت پر رہا کردیا تھا۔

اس موقع پر آصف علی زردادی نے جو پونے آٹھ برس سے قید میں ہیں صحافیوں سے بات کرتے ہوئے کہا کہ اگر غریبوں کو ملازمت دینا جرم ہے تو پھر سابق جرنیلوں کو ملازمتیں دینا اس سے بڑا جرم ہے۔ انہوں نے دھمکی آمیز انداز میں کہا کہ وقت بدلنے میں دیر نہیں لگتی اور آج کے حکمرانوں کو اپنے غیر قانونی اقدامات کو بھولنا نہیں چاہیے۔

دریں اثناء راولپنڈی کی احتساب عدالت کے جج نے پیپلز پارٹی کے رہنما آصف علی زرداری کی ایک درخواست منظور کرتے ہوئے انہیں ہسپتال کے لان میں چہل قدمی یعنی واک کرنے کی اجازت دے دی ہے۔

آصف علی زرداری جو پونے آٹھ برس سے مسلسل قید ہیں انہیں اسلام آباد کی سرکاری ہسپتال’پِمز‘ کے نجی وارڈ کے ایک کمرے کو سب جیل قرار دے کر رکھا گیا ہے۔