اعجاز مہر بی بی سی اردو ڈاٹ کام، اسلام آباد

کابینہ کے اراکین کی تعداد باسٹھ ہوگئی ہے

اتوار کے روز سید شریف الدین کو خارجہ، قانون انصاف اور انسانی حقوق کے متعلق جبکہ سلمان شاہ کو مالیات اور نیلوفر بختیار کو خواتین کی ترقی کے امور کے متعلق وزیراعظم کا مشیر بنایا گیا ہے۔

سید شریف الدین وزیراعظم کے اعزازی مشیر ہوں گے تاہم ان کا درجہ سینیئر وفاقی وزیر کے برابر ہوگا۔ نیلوفر بختیار سابقہ کابینہ میں بھی مشیر تھیں۔ حکام کا کہنا ہے کہ کابینہ میں مزید اضافہ بھی ہوسکتا ہے۔

تینوں مشیروں کی تقرری کی سفارش وزیراعظم نے خود کی جس کی صدر جنرل پرویز مشرف نے منظوری دی اور کابینہ ڈویژن نے نوٹیفکیشن جاری کیا۔ پہلے مرحلے میں بتیس وفاقی وزراء، دوسرے مرحلے میں ایک وفاقی اور چھبیس وزراء مملکت نے حلف اٹھایا تھا اور اب تین مشیروں کی تقرری ہوئی ہے۔

سنیچر کے روز حلف اٹھانے والے اکیلے وفاقی وزیر برائے خوراک و زراعت سکندر حیات بوسن تھے جو حکمران مسلم لیگ کے رکن اسمبلی ہیں۔ وہ سابقہ کابینہ میں اس وزارت کے وزیر مملکت تھے۔

دوسرے مرحلے میں حلف اٹھانے والوں میں بھی اکثریت حکمران مسلم لیگ کے اراکین کی ہے اور بیشتر نوجوان اراکین کو کابینہ میں شامل کیا گیا ہے۔ تینتیس وفاقی وزراء میں زبیدہ جلال واحد خاتون وزیر ہیں جبکہ چھبیس وزراء مملکت میں پانچ خواتین وزراء اور ان کے محکموں کے نام حسب ذیل ہیں۔

انیسہ زیب طاہر خیلی اطلاعات ونشریات، غلام بی بی بھروانہ تعلیم، حنا ربانی کھر اقتصادی امور، بیگم شہناز شیخ صحت، سمیرا ملک سیاحت۔ انیسہ زیب آفتاب شیرپاؤ گروپ کی تھیں، جبکہ غلام بی بی بھروانہ عمومی نشست پر کامیاب ہوئی تھیں۔ شہناز شیخ بینظیر بھٹو کی پارٹی کی ٹکٹ پر منتخب ہوئیں اور بعد میں پیٹریاٹ میں شامل ہوگئیں تھیں جبکہ سمیرا ملک سردار فاروق احمد لغاری کی بھانجی ہیں۔

سنیچر کو حلف اٹھانے والوں میں پیپلز پارٹی پیٹریاٹ کے سابقہ کابینہ میں شامل دو وزراء مملکت رئیس منیر احمد اور خالد احمد خان لوند شامل نہیں، انہیں فارغ کردیا گیا ہے۔

حلف اٹھانے والے چھبیس وزراء مملکت اور ان کے محکمے یوں ہیں۔ علی اسجد ملہی انفارمیشن ٹیکنالاجی اور ٹیلی کمیونیکیشن ڈویژن، ڈاکٹر عامر لیاقت حسین مذہبی امور، ملک امین اسلم خان ماحولیات، علی نواز خان مہر صنعت و پیداوار، انجینیئر امیر مقام پانی و بجلی، حامد یار ہراج تجارت، اسحاق خان خاکوانی ریلوے، محمد علی درانی ثقافت کھیل اور نوجونوں کے امور، مخدوم خسرو بختیار خارجہ کے وزارء مملکت ہوں گے۔

محمد علی ملکانی خوراک و زراعت، سردار محمد آصف نکئی ہاؤسنگ وتعمیرات، محمد رضا حیات ہراج پارلیمانی امور، میر محمد نصیر مینگل پیٹرولیم وقدرتی وسائل، عمر ایوب خان خزانہ، انجینیئر ایم شاہد جمیل قریشی مواصلات، شاہد اکرم بھنڈر قانون انصاف، ڈاکٹر شہزاد وسیم داخلہ، عمر احمد گھمن نجکاری و سرمایہ کاری، طارق عظیم خان سمندر پار پاکستانی ڈویژن، زاہد حامد دفاع اور چودھری ظفراقبال وڑائچ کو بلدیات و دیہی ترقی کے وزراء مملکت بنایا گیا ہے۔

یاد رہے کہ ظفراقبال وڑائچ چند ماہ قبل پیپلز پارٹی کے رکن اسمبلی تھے مگر اختلافات کی بنا پر مستعفی ہوکر دوبارہ حکمران مسلم لیگ کی ٹکٹ پر رحیم یار خان سے منتخب ہوئے تھے۔