عزیزاللہ خان بی بی سی اردو ڈاٹ کام، کوئٹہ

بلوچستان میں قوم پرست رہنما حکومت کے خلاف کئی ماہ سے احتجاج کر رہے ہیں

یہ جھڑپیں سنیچر کی صبح تین اور چار بجے کے درمیان اس وقت شروع ہوئیں جب قبائلی اپنے ایک رہنما جیلانی خان کی گرفتاری کے خلاف احتجاج کر رہے تھے۔

جیلانی خان کو کل شام کرائمز برانچ نے گرفتار کیا تھا جس کے بعد اشعرزئی قبائل نے کوئٹہ چمن شاہراہ احتجاج بند کر دی تھی۔ صبح کی اذان سے پہلے قبائلی گاڑیوں میں شہر کی طرف روانہ ہوئے جہاں ان کا پولیس اہلکاروں سے تصادم ہوا ہے۔ اب تک کی اطلاعات کے مطابق تین قبائلی اور ایک پولیس اہلکار ہلاک ہوئے ہیں اور دو قبائلی زخمی ہوئے ہیں۔

اس کے علاوہ قبائلیوں نے کوئٹہ سے چمن جانے والی ریل گاڑی کو شیلا باغ اور قلعہ عبداللہ کے درمیان رو ک دیا ہے اور قبائلی رہنما کی رہائی کا مطالبہ کیا ہے۔

چمن شہر میں حالات انتہائی کشیدہ بتائے گئے ہیں کاروباری مراکز اور دکانیں بند ہیں جبکہ جگہ جگہ سڑکوں پر ٹائر جلائے گئے ہیں۔ پولیس کی بھاری نفری علاقے میں تعینات کر دی گئی ہے ۔

یہاں یہ اطلاعات بھی موصول ہوئی ہیں کہ پاک افغان سرحد بند کر دی گئی ہے۔ متعلقہ حکام سے اس بارمیں رابطہ کرنے کی کوشش کی تو معلوم ہوا کے اس وقت امن و امان کے حوالے سے ایک اجلاس جاری ہے۔ تاہم ذرائع نے بتایا ہے کہ پاکستان سے افغانستان لوگوں کو جانے دیا جا رہا ہے لیکن افغانستان سے پاکستان کی جانب کسی کو آنے نہیں دیا جا رہا۔