خورشید قصوری نے مذاکرات کا عمل دوبارہ شروع کرنے کو پہیہ دوبارہ ایجاد کرنے سے تعبیر کیا

مسٹر قصوری نے کانگریس کی رہنما سونیا گاندھی کے اس بیان کا خیرمقدم کیا کہ ان کی حکومت پاکستان کے ساتھ امن مذاکرات کو جاری رکھے گی۔

ہندوستان کے چودھویں عام انتخابات میں کانگریس کے کامیابی کے بعد اپنے پہلے ردِ عمل میں سونیا گاندھی نے کہا تھا کہ ان جماعت شروع سے ہی پاکستان کے ساتھ مذاکرات سے متعلق وزیر اعظم واجپئی کے اقدامات کی حمایت کرتی رہی ہے۔

مسٹر خورشید قصوری نے نیویارک میں اخبار نویسوں سے بات چیت کرتے ہوئے اس بیان کا خیر مقدم کرتے ہوئے کہا کہ دونوں ملکوں کے مابین مذاکرات کا عمل مشکل مراحل سے گزر چکا ہے اور اب اس کو از سرنو شروع کرنے کا کوئی فائدہ نہیں ہے۔

وزیر خارجہ خورشید قصوری نے امید کا اظہار کیا کہ اس ماہ ہونے والے مذاکرات شیڈول کے مطابق ہوں گے۔

یادرہے کہ دونوں ملکوں کے مابین جوہری شعبے میں اعتماد کی فضا قائم کرنے کے لئے دوروزہ بات چیت دلی میں پچیس مئی سے شروع ہونا ہے اور پاکستان کی وزارت خارجہ کے ترجمان نے اعلان کیا ہے کہ پاکستان کی مذاکراتی ٹیم بھارتی دارالحکومت جانے کی تیاری کر رہی ہے۔