 |  ہیتھرو |
پی ایم ایل نواز کے صدر شہباز شریف لندن سے ابو ظہبی پہنچ گئے ہیں جہاں سے وہ پاکستان کے لیے روانہ ہوں گے۔ شہباز شریف اپنے ملک بدر کیے جانے کے تین سال سے زائد عرصے کے بعد وطن واپس جارہے ہیں۔ ابو ظہبی میں نامہ نگار ظفر عباس کے مطابق یہاں پہنچنے کے فوراً بعد شہباز شریف پاکستان میں اپنے حامیوں سے رابطے میں آگئے۔ یہاں سے وہ لاہور کے لیے اپنی اگلی فلائیٹ لیں گے۔ لاہور میں پی ایم ایل نواز کے کئی حامیوں کی گرفتاری اور لاہور ایئر پورٹ کے گرد بڑی تعداد میں پولیس کی تعیناتی کے باوجود مسلم لیگ کا کہنا ہے کہ توقع ہے کہ شہباز شریف کے استقبال کے لیے ہزاروں افراد جمع ہوں گے۔ لاہور سے نامہ نگار شاہد ملک کا کہنا ہے کہ پولیس نے ایئرپورٹ آنے والی شاہراہوں پر رکاوٹیں کھڑی کردی ہیں تاہم پبلک ٹرانسپورٹ کو اجازت ہے کہ وہ ابھی بھی ان راستوں سے گزر سکتی ہے۔ یوں معلوم ہوتا ہے کہ جیسے سابق وزیر اعظم نواز شریف کے خاندان اور صدر جنرل پرویز مشرف کے درمیان ایک اعصابی جنگ جاری ہے۔ نواز شریف ابھی بھی سعودی عرب میں جلا وطنی کی زندگی گزار رہے ہیں جبکہ شہباز شریف نے پاکستان واپس نہ آنے پر پابندی کی خلاف ورزی کا فیصلہ کیا ہے۔ ان کا کہنا ہے کہ وہ وطن واپس آکر ہی رہیں گے خواہ انہیں وہاں پہنچنے پر گرفتار ہی کیوں نہ کرلیا جائے۔ ان کے مطابق یہ صدر مشرف کے اس دعوے کے لیے ایک امتحان ہے کہ پاکستان میں جمہوریت پوری طرح بحال ہوچکی ہے۔ ابھی یہ واضح نہیں ہے کہ ان کے لاہور پہنچنے پر انہیں محض گرفتار ہی کیا جائے گا یا پھر سعودی عرب جلاوطن کردیا جائے گا۔ | 
یہ صفحہ دوست کو ای میل کیجیئے
پرِنٹ کریں
