اعجاز مہر بی بی سی اردو ڈاٹ کام، اسلام آباد

قومی سلامتی کونسل صدر مشرف کے خواہشات کے مطابق آئینی حیثیت حاصل نہیں کر سکی تاہم اس کا قانون دونوں ایوانوں سے منظور ہو گیا

اس ضمن میں جب وزیر مملکت برائے قانون و انصاف و پارلیمانی امور رضا حیات ہراج سے رابطہ کیا گیا تو ان کا کہنا تھا کہ جب وزیراعظم بیرون ملک دورے سے واپس آئیں گے تو ان سے اجازت لے کر قواعد و ضوابط بنائے جائیں گے۔

تاہم سلامتی کونسل کا اجلاس بلائے جانے کے بارے میں ان کا کہنا تھا کہ اس کا اختیار صدر مملکت کو ہے۔

قومی سلامتی کونسل کے قیام سے پاکستان میں پہلی بار فوج کو سیاسی امور میںباضابطہ کردار حاصل ہو جائے گا اور حزب اختلاف کی تمام جماعتیں بشمول متحدہ مجلس عمل اس بات کی مخالف ہیں۔

تیرہ رکنی سلامتی کونسل جس کے سربراہ صدر ملکت ہوں گے اور اراکین میں وزیراعظم، چیئرمین سینیٹ، قومی اسمبلی کے سپیکر اور قائد حزب اختلاف، چاروں صوبوں کے وزراء اعلیٰ، چیئرمین جوائنٹ چیفس آف سٹاف کمیٹی، اور تینوں مسلح افواج ( بری، بحری اور فضائیہ) کے سربراہ شامل ہوں گے۔

بظاہر یہ کونسل ملکی سلامتی، دفاع اور بحران جیسی صورتِ حال سے نمٹنے کے لئے مشاورتی فورم کا کردار ادا کرے گی۔

حزب اختلاف کا کہنا ہے کہ یہ ادارہ پارلیمان سے بالاتر ہوگا اور اس سے جمہوریت کو شدید دھچکا لگے گا، جبکہ حکومت کا دعویٰ ہے کہ اس کونسل کے قیام سے جمہوریت مضبوط ہوگی اور مستقبل میں فوجی مداخلت کا راستہ روکنے میں مدد ملے گی۔

کونسل کی ہیئیتِ ترکیبی کے مطابق قومی اسمبلی میں قائد حزب اختلاف تیرہ ارکان میں شامل ہیں لیکن سترہ ماہ گزرنے کے باوجود بھی سپیکر حزب اختلاف کا رہنما نامزد نہیں کر پائے۔

وزیراعظم میر ظفراللہ جمالی نے سترہ ماہ بعد حال ہی میں ایک نجی ٹی وی کو انٹرویو دیتے ہوئے واضع کیا تھا کہ قومی اسمبلی میں قائد حزب اختلاف کا عہدہ مجلس عمل کو ملے گا۔

جب اس ضمن میں مجلس کے رہنما حافظ حسین احمد سے پوچھا گیا کہ انہوں نے تو قومی سلامتی کونسل کی مخالفت کی تھی اب ان کے اتحاد کا قائد حزب اختلاف، کیا کونسل کے اجلاس میں شریک ہوگا، تو ان کا کہنا تھا کہ جب تک سلامتی کونسل کا سربراہ وزیر اعظم نہیں ہوگا وہ کسی اجلاس میں شریک نہیں ہوں گے۔