اعجاز مہر بی بی سی اردو ڈاٹ کام، اسلام آباد

لاہور ہائی کورٹ کی پنڈی بنچ کی جواب طلبی

درخواست گزاروں کے وکیل اکرام چودھری نے بتایا کہ جناب جسٹس سردار محمد اسلم پر مشتمل بنیچ کے سامنے داخل چھ فوجی افسران کے ورثاء کی درخواستوں میں وفاقی سیکرٹری دفاع اور داخلہ کے علاوہ خفیہ ایجنسی آئی ایس آئی کے ڈائریکٹر جنرل کو بھی فریق بنایا گیا تھا۔

عدالت نے منگل کو مختصر سماعت کے بعد تمام فریقین کو علیحدہ علیحدہ نوٹس جاری کرنے کا حکم دیا۔

وکیل کا کہنا تھا کہ القاعدہ سے تعلقات کے شبہ میں کرنل خالد عباسی، کرنل غفار بابر، میجر روہیل فراز، میجر عطاءاللہ ،میجر عادل فردوس، اور کیپٹن عثمان کو جو تمام حاضر سروس فوجی افسر ہیں کئی ماہ سے حراست میں رکھا گیا ہے۔

ایڈوکیٹ اکرام چودھری کے مطابق درخواستوں میں استدعا کی گئی ہے کہ ان فوجیوں کی حراست غیر قانونی ہے اور ان کو جلد رہا کیا جائے۔

درخواستوں میں عدالت سے یہ بھی کہا گیا ہے کہ حکومت کو پابند کیا جائے کہ کسی زیر حراست افسر کو غیر ملک کے حوالے نہ کرے۔