صدر مشرف کا سٹلائیٹ پر دہلی حطاب

صدر مشرف کا کہنا تھا کہ بھارت کے دفاعی سودے پاکستان کے لیئے کوئی خطرہ نہیں بلکہ خطے میں طاقت کی نمائش کے مترادف ہے۔انہوں نے کہا کہ گزشتہ چار برسوں سے پاکستان نے اپنے دفاعی بجٹ کو منجمد کر رکھا ہے اور اب وقت ہے کہ بھارت پاکستان کی پیروی کرتے ہوئے اپنے دفاعی اخراجات کم کرے۔

مشرف نے اس خطاب کے دوران کہا کہ پا کستان اور بھارت تقریباً نصف صدی سے باہمی اختلافات میں اپنا وقت ضائع کر چکے ہیں اور اب دونوں کو چاہیے کہ ماضی کو بھول کر مستقبل کی طرف دھیان دیں۔

ان کا کہنا تھا کہ دونوں ممالک کے درمیان تناؤ کی بڑی وجہ کشمیر رہا ہے اور اس مسئلے کا فوری اور پائیدار حل ہی دونوں ممالک کے تعلقات کو ایک نئی راہ دے سکتا ہے۔

ان کا کہنا تھا اب دونوں ممالک کے لیئے اختلافات کو ختم کرنے اور دوستی کا ہاتھ بڑھانے کا یہ موزوں ترین وقت ہے تاکہ امن و آشتی کا ایک نیا باب رقم کیا جا سکے۔

خطے میں امن و آشتی کے لیئے پیش قدمی پر زور دینے کے ساتھ ساتھ صدر مشرف کا کہنا تھا کہ یہ نہیں بھولنا چاہیے کہ دونوں جانب شدت پسند عناصرموجود ہیں جو اس پیش رفت میں رخنہ ڈالیں گے اور دونوں ممالک کو ان سے بڑی سمجھداری سے نمٹنا ہو گا۔

دو روزہ اس سمینار کا انعقاد بھارتی میڈیا گروپ ”انڈیا ٹوڈے " نے کیا تھا۔