ہارون رشید بی بی سی اردو ڈاٹ کام، پشاور

حملہ وانا کے قریب اعظم ورسک کے علاقے میں ہو سکتا ہے

ادھر جنوبی شہر ڈیرہ اسماعیل خان میں بھی قانون نافذ کرنے والے اداروں کے اہلکاروں نے القاعدہ کے حامیوں کی موجودگی کے شک میں ایک مدرسے پر چھاپہ مارا ہے جس میں تین افراد کو حراست میں لینے کی اطلاع ہے۔

حکومت کے دباؤ کی وجہ سے جنوبی وزیرستان کے احمد زئی وزیر قبائل کی سب سے بڑی ذیلی شاخ ذلی خیل نے دو روز قبل جس مسلح لشکر کے قیام کا اعلان کیا تھا بظاہر اُس کے حرکت میں آنے کا وقت آگیا ہے۔ اِن قبائل نے حکومت کو مطلوب افراد کو ہتھیار ڈال دینے کے لئے دو روز کا وقت دیا تھا۔

مطلوب افراد  حکومت کو پانچ مقامی قبائلی مطلوب ہیں جن پر اسے شک ہے کہ انہوں نے القاعدہ کے ارکان کو پناہ دے رکھی تھی

حکومت کو پانچ مقامی قبائلی مطلوب ہیں جن پر اسے شک ہے کہ انہوں نے القاعدہ کے ارکان کو پناہ دے رکھی تھی۔ ان میں حاجی شریف، اس کا بھائی نور اسلام، مولوی عباس، نیک محمد اور مولوی عزیز شامل ہیں۔ ماضی میں انہیں گرفتار یا اپنے آپ کو حکام کے حوالے کرنے کی تمام کوششیں ناکام رہی ہیں۔ حکومت کی جانب سے انہیں کسی دوسرے ملک کے حوالے نہ کرنے کے رعایتی اعلان کا بھی ان پر بظاہر کوئی اثر نہیں ہوا ہے۔

اعظم ورسک کے علاقے میں پاکستانی فوج اس سے قبل تین کارروائیاں کر چکی ہے تاہم توقع ہے کہ تازہ کارروائی صرف قبائلی کریں گے جبکہ مقامی حکام ان کی نگرانی کریں گے۔

ادھر ڈیرہ اسماعیل خان سے اطلاعات ہیں کہ جمعے کی رات قانون نافذ کرنے والے اداروں نے مدرسہ فاروق اعظم نامی ایک دینی درس گاہ پر چھاپہ مارا ہے اور اس کے مُہتمم قاری محمد اشفاق کے علاوہ دو دیگر افراد کو حراست میں لیا ہے۔

حکام کو شک تھا کہ جنوبی وزیرستان سے فرار ہونے والے القاعدہ کے لوگ یہاں موجود ہیں۔ البتہ حراست میں لئے جانے والے تمام افراد مقامی بتائے جاتے ہیں جبکہ قاری محمد اشفاق کے بارے میں کہا جاتا ہے کہ وہ جمعیت علما اسلام کے سربراہ مولانا فضل الرحمان کے بھی کافی قریب ہیں۔ اس بارے میں جے یو آئی کا ردعمل ابھی سامنے نہیں آیا ہے۔