کوئٹہ میں فائرنگ سے پولیس اہلکار ہلاک
،تصویر کا ذریعہAFP
پاکستان کے صوبہ بلوچستان کے دارالحکومت کوئٹہ میں نامعلوم مسلح افراد نے فائرنگ کر کے پولیس کے ایک اسسٹنٹ سب انسپکٹر کو ہلاک کر دیا ہے۔
مقامی پولیس کے ایک اہلکار نے بی بی سی کو بتایا کہ منگل کی شب سریاب تھانے کے اے ایس آئی عزیز الرحمان پر یہ حملہ اس وقت ہوا جب وہ ڈیوٹی کے بعد گھر جا رہے تھے۔
اہلکار کے مطابق ان پر چھکی شاہوانی کے علاقے میں نامعلوم مسلح افراد نے حملہ کیا جس میں وہ شدید زخمی ہوئے۔
انھیں علاج کے لیے سول ہسپتال منتقل کردیا گیا جہاں وہ زخموں کی تاب نہ لا کر چل بسے۔
اے ایس آئی کے قتل کے بارے میں تحقیقات کا حکم دیا گیا ہے۔
رواں مہینے کے دوران پولیس اہلکاروں پر یہ دوسرا حملہ ہے۔
End of سب سے زیادہ پڑھی جانے والی
چار جولائی کو چمن پھاٹک کے علاقے میں نامعلوم مسلح افراد نے ایک مسجد کے اندر فائرنگ کر کے پولیس کے ایک انسپکٹر کو ہلاک کیا تھا۔
اس سے قبل جون کے آخری ہفتے میں بھی کوئٹہ شہر میں سریاب کے علاقے میں پولیس اہلکاروں پر دو حملے ہوئے تھے جن میں چار پولیس اہلکار ہلاک ہوئے تھے۔
رواں سال اب تک کوئٹہ شہر میں پولیس اہلکاروں پر ہونے والے حملوں میں 34 پولیس اہلکار ہلاک اور متعدد زخمی ہوئے ہیں۔
بلوچستان میں حالات کی خرابی کے بعد سے بدامنی کے دیگر واقعات کے علاوہ پولیس اہلکاروں پر بھی حملوں کا سلسلہ جاری ہے تاہم سرکاری حکام کا کہنا ہے کہ پہلے کے مقابلے میں اب حالات میں بہتری آئی ہے۔
