پاکستان میں ویکسین کی آزمائش: ویکسین کون سی ہے اور آزمائش کا طریقہ کار کیا ہے
،تصویر کا ذریعہReuters
- مصنف, حمیرا کنول
- عہدہ, بی بی سی اردو، اسلام آباد
پاکستان کے دارالحکومت اسلام آباد میں شفا انٹرنیشنل ہسپتال کے کورونا وارڈ میں مریضوں کی تعداد کم ہونے کے بعد حالیہ ہفتوں میں ایک بار پھر کچھ زیادہ ریکارڈ کی گئی ہے۔ لیکن اب اسی ہسپتال کے ایک دوسرے حصے میں کورونا وائرس سے بچاؤ کی تجرباتی ویکسین کے لیے رضا کاروں کی آمد شروع ہو چکی ہے۔
یہاں بھی منظر وہی ہے یعنی اندر جانے کے لیے اجازت حفاظتی تدابیر، سماجی فاصلہ اور ماسک کا استعمال لازم ہے۔
اس ویکسین کو چین کی کمپنی بائیو ٹیک کینسائنو بائیو نے بیجنگ انسٹی ٹیوٹ آف ٹیکنالوجی کے اشتراک سے بنایا ہے۔ اسے ’اے ڈی فائیو نوول کورونا وائرس ویکسین‘ کا نام دیا گیا ہے۔ پاکستان میں اس کے ’فیز تھری‘ یا تیسرے مرحلے کی آزمائش ہوگی۔
پاکستان کی طبی تاریخ میں یہ پہلا موقع ہے جب یہاں کسی ویکسین کی آزمائش کی جا رہی ہے اور امید کی جا رہی ہے کہ کامیابی کی صورت میں یہ ویکسین ایک بڑی مقدار میں پاکستان کو بھی مل سکے گی۔
ہسپتال کے شعبہ متعدی امراض کے سربراہ اور کووڈ 19 سے بچاؤ کے لیے چین کی ویکسین کے لیے شفا ہسپتال میں اعلیٰ تحقیق کار ڈاکٹر اعجاز خان سے ملاقات ہوئی۔
بی بی سی سے گفتگو میں انھوں نے بتایا کہ ’دنیا میں اس وقت 150 ویکسین تجرباتی مراحل سے گزر رہی ہیں اور ان میں سے 25 انسانوں پر آزمائش کے مرحلے میں داخل ہو چکی ہیں اور پانچ سے سات ایسی ہیں جو اس ایڈوانس تیسرے مرحلے میں ہیں۔‘
یہ بھی پڑھیے
End of سب سے زیادہ پڑھی جانے والی
انھوں نے بتایا کہ پاکستان کے پانچ ہسپتالوں میں 10 ہزار رضاکاروں کو یہ ویکسین لگائی جائے گی جبکہ دنیا میں مجموعی طور پر کل 40 ہزار رضا کار اس میں شامل ہوں گے۔
فیز تھری، اہمیت و طریقہ کار
اس تحریر میں ایسا مواد ہے جو Google YouTube کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Google YouTube ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
YouTube پوسٹ کا اختتام
ڈاکٹر اعجاز کہتے ہیں کہ فیز تھری تک کسی ویکسین کے پہنچنے کا مطلب ہے کہ وہ کلینیکل آزمائش اور انسانوں پر آزمائش کے ابتدائی مراحل میں کامیاب ہو چکی ہے یعنی ویکسین اپنے محفوظ ہونے کے عمل کو دکھا چکی ہے کہ یہ انسانوں میں کام کر سکتی ہے۔
ابتدا میں ویکسین کو جانوروں پر آزمایا جاتا ہے پھر کم تعداد میں انسانوں پر تجربہ کیا جاتا ہے۔
پہلے دو مراحل یعنی فیز ون اور فیز ٹو کا تجربات چین میں ہی ہوئے تھے۔
ماہرین کہتے ہیں کہ اس میں نتائج کے مطابق ایک فیصد مضر اثرات یا سائیڈ افیکٹس دیکھنے کو ملے۔
لیکن اس سلسلے میں لمبے عرصے تک انتظار نہیں کیا گیا کیونکہ ایک سے دو سال تک ویکسین کو مارکیٹ میں لے کر آنا چاہتے ہیں۔ اب دیکھنا یہ ہے کہ تیسرے مرحلے میں اے ڈی فائیو ناول کرونا وائرس ویکسین کو زیادہ آبادی کو لگائیں تو کیا ہو گا۔ اس سے پتہ چلے گا کہ یہ کس قدر محفوظ اور موثر ہے۔
یہ ویکسین کیسے بنائی گئی ہے؟
ڈاکٹر اعجاز کہتے ہیں کہ ویکسین میں کورونا وائرس میں شامل پروٹین کو ایک اور وائرس، ایڈینو وائرس (عام نزلہ زکام) کو استعمال کر کے اسے کمزور کر دیا جاتا ہے تاکہ یہ مزید نہ بڑھے۔ یعنی کورونا وائرس کی سپائک پروٹین کا استعمال کیا جاتا ہے۔ اس عمل کو ریکامبیڈنٹ ٹیکنالوجی سے بناتے ہیں۔ اس سے جسم میں اینٹی باڈیز بننتی ہیں۔ اس کا بڑی آبادی میں (سیلولر اور ہیمورل) ردعمل دیکھا جاتا ہے۔ اس سے رضا کار کو کورونا کے ہونے کا خطرہ نہیں اور ہسپتال کے عملے کو اس ویکسین کے حوالے سے تربیت بھی دی گئی ہے۔
دیگر آزمائشوں کی طرح اس آزمائش میں بھی رینڈم سیمپلنگ ہوگی یعنی افراد میں سے کچھ کو ویکسین لگے گی اور کچھ کو پلیسیبو یعنی بظاہر ویکسین جیسا مواد ہوگا لیکن وہ ویکسین نہیں بلکہ بے اثر مادہ ہوگا۔
آزمائش کا حصہ بننے کے لیے شرائط
یہ رضاکارانہ طور پر لگائی جائے گی یعنی اسے لگانے والے کی مرضی پوچھی جائے گی اور اسے ایک سال تک ماہرین کے رابطے میں رہنا ہوگا۔ مریض کو کوئی معاوضہ تو نہیں ملے گا تاہم اس کا طبی معائنہ ہوتا رہے گا اور شہر کے باہر سے آنے والوں کو ٹرانسٹورٹ الاؤنس دیا جائے گا۔
آزمائش میں حصہ لینے کے لیے عمر کی حد 18 برس رکھی گئی ہے۔ طبی ماہرین کا کہنا ہے کہ اس کے لیے کچھ مخصوص شرائط بھی پیں۔
یعنی رضاکار کو پہلے سے کورونا نہ ہوا ہو، حاملہ خواتین اور پہلے سے معلوم شدہ کسی بڑی بیماری میں مبتلا افراد کو اس آزمائش میں شامل نہیں کیا جائے گا۔
جن افراد میں قوت مدافعت کی کمی ہو یا وہ ایچ آئی وی میں مبتلا ہوں وہ بھی اس کا حصہ نہیں بن سکتے۔ ساتھ ہی ساتھ وہ افراد جو کورونا وائرس سے بچاؤ کے لیے دی جانے والی دواؤں کا استعمال کر رہے ہوں یا پھر کسی اور ویکسین کا استعمال کر رہے ہوں، وہ بھی آزمائش میں حصہ نہیں لے سکتے۔
تاہم دل کی بیماری اور شوگر میں مبتلا افراد اگر صحت مند ہیں تو وہ بھی اس آزمائش کا حصہ بن سکتے ہیں۔
،تصویر کا ذریعہGetty Images
رضا کار کے خون کا نمونہ سال کے بعد بھی لیا جائے گا جبکہ اسے ہسپتال کے متعلقہ شعبے کا نمبر بھی دیا جائے گا تاکہ ضرورت کی صورت میں وہ رابطہ کر سکیں۔ ہسپتال بھی ہر ہفتے رضا کار سے بذریعہ ایس ایم ایس رابطہ کرے گا۔
لیکن ڈاکٹر اعجاز کہتے ہیں کہ دنیا میں کل 40 ہزار میں سے سات فیصد رضاکاروں کے دیگر کی نسبت زیادہ ٹیسٹنگ ہوگی۔
ان کا کہنا ہے کہ پاکستان میں ایسے رضاکاروں کی تعداد دو سو سے چھ سو ہو گی۔
ڈاکٹر اعجاز کے مطابق ’انھیں 28ویں دن اور چھ مہینے کے بعد بھی ہسپتال آنا ہوگا اور ان کا تفصیلی معائنہ ہوگا‘۔
وہ کہتے ہیں کہ شروع میں ویکسین کے اثرات پہلے سات دن کے بعد سے شروع ہوتے ہیں اور 28 دن تک سب رضا کاروں میں اس کا ردعمل آ جاتا ہے۔
حکام اس سلسلے میں میڈیا کو آگاہی مہم کے لیے استعمال کریں گے تاہم ابتدا میں ہسپتال اپنے طور پر اسے شروع کریں گے۔
ایک فیصد مضر اثرات یا سائڈ افیکٹ
،تصویر کا ذریعہSHIFA INTERNATIONAL HOSPTIAL
ماہرین کا کہنا ہے کہ چین میں کورونا وائرس کی ویکسین کی آزمائش میں پہلے دو مراحل میں سائڈ افیکٹس یا مضر اثرات ایک فیصد تک سامنے آئے۔
ڈاکٹر اعجاز کہتے ہیں کہ عالمی ادارہ صحت، ڈبلیو ایچ او کا یہ معیار ہے کہ اگر کوئی ویکسین 50 فیصد موثر ہونا دکھا رہی ہے تو اسے استعمال کیا جائے گا۔ اور یہ بھی کہ اس سے نقصانات تو نہیں ہو رہے۔
اس ویکسین کو لگانے کے بعد ’ٹیکے کی جگہ درد، بخار، سر درد جسم میں درد اور دل خراب ہونا۔ یہ علامات ایک دو دن کے لیے ہوتی ہیں۔ جب بھی ویکسین لگائی جاتی ہے اس کے لیے بخار اور سر درد کی دوا لینی ہوتی ہے۔'
ویکسین کے لیے طریقہ کار بھی تبدیل ہو سکتا ہے
ڈاکٹر اعجاز کہتے ہیں کہ جوں جوں وقت گزرے گا تو پاکستان سمیت دنیا بھر سے اس تحقیق اور آزمائش کے نتائج آئیں گے۔
’اسے ہم ’ایڈیپٹڈ ڈیزائن ٹرائل‘ کہتے ہیں کیونکہ باقی ممالک میں ابھی یہ ویکسین لگ رہی ہے، ڈیٹا آرہا ہے۔ ہو سکتا ہے اس پر تجزیہ کرنے کے بعد اسے دیکھتے ہوئے اس میں تبدیلی لائیں۔ ہو سکتا ہے کہیں کہ 18 سال سے کم والوں کو بھی ویکسین لگائیں۔ ہو سکتا ہے ابھی جو ایک ڈوز دی جا رہی ہے آگے چل کر دو ویکسین دینی پڑیں۔‘
فیز فور: پوسٹ مارکیٹنگ سرویلینس
ڈاکٹر اعجاز نے بتایا کہ کامیابی کی صورت میں اسے عام پبلک کو لگایا جا سکے گا تاہم ویکسین کو بظاہر تو تیسرے مرحلے میں کامیابی کے بعد بھی چیک کیا جاتا ہے۔ ان کے مطابق عارضی اثرات تو دیکھنے میں آتے ہیں اور اس میں لوگوں سے پوچھا جاتا ہے کہ انھیں کوئی بڑا سائیڈ افیکٹ تو نہیں ہوا۔ یہ بھی دیکھا جاتا ہے کہ لمبے عرصے تک اس کا کتنا اثر ہوتا ہے اور اس کے لیے انتظار کرنا پڑتا ہے۔
’ایک ویکسین مارکیٹ میں آنے اور لوگوں میں استعمال ہونے کے بعد بھی زیر تحقیق رہتی ہے جسے فیز فور کا نام دیا گیا ہے یعنی فیز 3 پر کام رک نہیں جاتا۔ یہ کئی سال تک چلتا رہتا ہے۔‘
