#ووٹ_کو_عزت_دو: آرمی ایکٹ کے ترمیمی بل کی غیر مشروط حمایت پر مسلم لیگ نون شدید تنقید کی زد میں

گذشتہ روز پاکستان کی دو بڑی اپوزیشن جماعتوں پاکستان مسلم لیگ ن اور پیپلز پارٹی کی جانب سے آرمی ایکٹ میں ترمیم کے بل کی حمایت کے اعلان کے بعد سوشل میڈیا پر اسے شدید تنقید کا نشانہ بنایا گیا۔

اور اس کے ساتھ ہی #ووٹ_کو_عزت_دو بھی پاکستانی سوشل میڈیا پر ٹاپ ٹرینڈ بن گیا۔

پاکستان مسلم لیگ ن کی جانب سے آرمی ایکٹ کے ترمیمی بل (جس کا مقصد پاکستان آرمی کے سربراہ کی مدت ملازمت میں توسیع ہے) کی غیر مشروط حمایت کی خبر پر اس کے حمایتی پہلے حیران پھر پریشان اور اس کے بعد خاصے برہم نظر آئے۔

یہ بھی پڑھیے

انسان کو عزت دو!

مریم نواز: ’بیانیہ ایک ہی ہے کہ ووٹ کو عزت دو‘

آرمی چیف کی مدتِ ملازمت:فیصلے پر نظرثانی کی اپیل

مسلم لیگ کے ایک ووٹر محمد مغل نے اپنے لیڈر کو مخاطب کرتے ہوئے کہا کہ ’میں وہاں تھا جب جب میاں نواز شریف کہہ رہے تھے ووٹ کو عزت دو۔ میں گجرانوالہ میں آپ کے سامنے کھڑا تھا۔ اب میں آپ سے یہی چاہتا ہوں۔ ہم آپ کے ساتھ کھڑے تھے آپ کو بھی ہمارے ساتھ کھڑا ہونا چاہیے۔‘

جبکہ حسن خان کا مایوسی کا اظہار کرتے ہوئے کہنا تھا کہ ’تمام سیاسی جماعتوں نے اپنے کارکنان کو مایوس کیا ہے۔ اگر آپ لوگوں کی امنگوں کی ترجمانی پارلیمان میں نہیں کر سکتے تو انہیں اپنے نام نہاد انقلابی نعروں سے بے وقوف نہ بنائیں۔‘

مسلم لیگ نواز کے حمایتیوں کی جانب سے سخت ردعمل سامنے آنے کے بعد پارٹی کے قائد نوازشریف کا جماعت کے عہداروں کے نام ایک مبینہ خط سامنے آیا جس میں تمام پارلیمانی تقاضوں کو پورا کرنے کی بعد اس کی منظوری دینے کی تلقین کی گئی ہے۔

عبدالقیوم خان کا اس ’خط‘ پر تبصرہ کرتے ہوئے کہنا تھا کہ ’سنا ہے کہ ایک انتہائی بڑے لیڈر جنہوں نے ووٹ کو عزت دو کا نعرہ تخلیق کیا انہوں نے خط لکھا ہے کہ ایکسٹنشن تو دو مگر ذرا اس بات کا خیال رکھو کہ ایسا نہ لگے این آر او دو اور ایکسٹنشن لو والی ڈیل ہوئی ہے۔‘

جبکہ صحافی رضا رومی کا کہنا تھا کہ ’مسلم لیگ ن کا فیصلہ ان کی حالیہ پالیسی کا مظہر ہے۔ اگر آپ کو حیرت ہو رہی ہے تو یہ آپ کا مسئلہ ہے۔ پنجاب کی پارٹی اسٹیبلشمنٹ سے زیادہ دیر جھگڑا نہیں کر سکتی۔ ان دونوں فریقین کا تعاون ملک میں سیاسی استحکام کے لیے ضروری ہے۔ لگتا ہے کہ شہباز شریف اب ڈرائیونگ سیٹ پہ براجمان ہیں۔‘

صحافی سلیم صافی نے رضا رومی سے اتفاق کرتے ہوئے کہا ’نون لیگ کا یو ٹرن دراصل اس وسیع ترمفاہمت کا حصہ ہےجو ’ملک‘ اور شریف فیملی کے وسیع تر مفاد میں گذشتہ سال ہوچکی ہے۔ جس کے تحت مریم نواز خاموش ہیں۔ شریفوں کا نام نہاد اختلاف فقط اتنا ہے کہ چھوٹے شریف ایک صوبے سے آغاز پر راضی ہوگئے ہیں جبکہ بڑے شریف مرکز سے آغاز پر اصرار کر رہے تھے۔‘

مسلح افواج کے سربراہ کی مدت ملازمت میں توسیع سے متعلق الگ الگ بل جب قومی اسمبلی میں پیش کیا گیا تو حزب مخالف کی جماعتوں نے اس پر اپنے تحفظات کا اظہار کرتے ہوئے موقف پیش کیا کہ اس معاملے میں پارلیمانی قواعد و ضوابط کی پیروی کی جائے۔ جس کے بعد بل کو قومی اسبلی کی قائمہ کمیٹی برائے دفاع کو بھیج دیا گیا۔

تاہم ناقدین اپوزیشن جماعتوں کی اس چھوٹی سے مزاحمت سے زیادہ متاثر دکھائی نہیں دیے۔

صحافی بےنظیر شاہ کا کہنا تھا کہ ’حزب اختلاف نے اس (آرمی ایکٹ) ترمیمی بل کی حمایت کا فیصلہ کسی کمیٹی کی جانب سے پڑتال اور پارلیمان میں بحث سے قبل ہی کرلیا تھا تو اب ان تکلفات میں پڑھنے کی کیا ضرورت ہے۔‘

جہاں لوگوں نے مسلم لیگ نواز اور پاکستان پیپلزپارٹی کی جانب سے اس بل کی حمایت کے فیصلے کو تنقید کا نشانہ بنایا وہیں پختون تحفظ موومنٹ کے ممبر پارلیمان محسن داوڑ کی جانب سے اس بل کی مخالفت کو سراہا۔

آسیہ رحمان کا کہنا تھا کہ ’امید ہے کہ اب پی ٹی ایم کے سینیر کارکنان اور رہنما کو پتہ چل گیا ہوگا کہ مسلم لیگ نواز اور پاکستان پیپلزپارٹی جیسی بڑی جماعتوں کے ساتھ کھڑے ہونے کا کوئی فائدہ نہیں ہے۔

وہیں پی ٹی آئی کے سپورٹرم اپنی رائے دینے میں پیچھے نہ رہے۔ ایک ٹوئٹر صارف کا کہنا تھا کہ ’ہمیں تنقید کے بجائے جسٹس کھوسہ کو ان کے اس انوکھے آئیڈیا کے لیے شکر ادا کرنا چاہیے۔ اب کم سے کم پاکستان تحریک انصاف کو ایکسٹنشن کے لیے مورد الزام نہیں ٹھرایا جائے گا۔‘

گزشتہ روز میڈیا میں مسلم لیگ نون کی طرف سے آرمی چیف کی مدت ملازمت میں توسیع کی حمایت سے متعلق خبریں چلیں تو ’ووٹ کو عزت دو‘ کا نعرہ لگانے والی جماعت نے اس کی تردید یا تصدیق نہیں کی تھی۔

حال ہی میں اینٹی نارکوٹکس فورس کی قید سے رہا ہونے والے رکن قومی اسمبلی رانا ثنااللہ نے صحافیوں کو بتایا کہ ان کی جماعت کی پارلیمانی پارٹی نے آرمی چیف کی توسیع سے متعلق جو حمایت کی ہے وہ غیر مشروط ہے تو پھر اسے ڈیل کیسے کہا جا سکتا ہے۔

ان کا کہنا تھا کہ پوری جماعت پارلیمانی کمیٹی کے فیصلے کے ساتھ کھڑی ہو گی۔

بس پھر کیا تھا سوشل میڈیا بریگیڈ حرکت میں آگئی اور نون لیگ کی اس حمایت اور خاموشی پر خوب خبر لی اور ’ووٹ کو عزت دو‘ کے نام سے ایسا نیا ٹرینڈ بنایا کہ جو کبھی لیگی قیادت خود فخر سے پیش کرتی تھی۔

صحافی طلعت حسین کا کہنا تھا ’شھباز شریف اور نواز شریف نے آرمی ایکٹ کی ترامیم پر PTI کا تھوکا چاٹ کر آج ووٹ اور ووٹر کو تاریخی عزت دی ہے۔‘

ماہا نظام خیل نامی صارف نے لکھا ’میرے ووٹ کی عزت کو ن لیگ نے رول دیا۔‘

ایک اور صارف نے نواز شریف کی تصویر کے ساتھ ٹویٹ کیا ’بوٹ کو عزت دو۔‘

وفاقی حکومت نے سپریم کورٹ کے فیصلے کے خلاف نظرثانی کی اپیل بھی دائر کر رکھی ہے، تاہم سماعت کا انتظار کیے بغیر حکومت نے آرمی ایکٹ میں ترمیم کا آپشن اختیار کیا۔ وفاقی وزیر ریلوے شیخ رشید نے کچھ دن قبل ہی بتا دیا تھا کہ آرمی چیف کی توسیع سے متعلق حکومت کو تمام سیاسی جماعتوں کی حمایت حاصل ہے۔