گوانتانامو میں ممکن ہے کچھ ایسے قیدی بھی ہوں جن کے بارے میں کسی کو معلوم نہیں

محکمۂ دفاع نے یہ نام خبر رساں ایجنسی اے پی کی درخواست پر ظاہر کیے ہیں
جس نے آزادی اطلاعات کے قانون کے تحت درخواست دائر کی تھی۔ گوانتانامو جیل کے بہت سے قیدیوں کے نام پہلی بار ظاہر کیے گئے ہیں۔

شائع کی جانے والی دستاویزات دراصل ان ٹربیونلوں کی کارروائی کا ریکارڈ ہے جنہوں نے تعین کرنا تھا کہ آیا قیدی امریکہ کے دوست ہیں یا دشمن۔ اسی لیے ان دستاویزات میں صرف ان قیدیوں کے نام شامل ہیں جو اس عمل سے گزرے تھے۔ بی بی سی کے نامہ نگار کے مطابق ممکن ہے کہ ان کے علاوہ بھی لوگ گوگانتانامو میں قید ہوں۔

بی بی سی کے نامہ نگار کا کہنا ہے کہ شائع کیے جانے والی دستاویزات کو پڑھنے اور ان کے تجزیے میں کئی روز بلکہ کئی ہفتے لگ سکتے ہیں لیکن اب جلد ہی قیدیوں کی شناخت کے علاوہ ان کے جیل میں شب روز کے بارے میں بھی بہت کچھ معلوم ہو جائے گا۔

گوانتاناموں جیل میں زبردستی
کویت سے تعلق رکھنے والے ایک قیدی نے بی بی سی کو بتایا کہ بھوک ہڑتال کرنے والوں کو زبردستی خوراک دی جاتی ہے جس میں تشدد بھی ہوتا ہے۔

بی بی سی کو اپنے وکیل کے ذریعے دیے گئے انٹرویو میں انہوں نے کہا کہ بھوک ہڑتال کرنے والوں کو دن میں تین بار کرسی سے باندھ کر نلکی کے ذریعے خوراک دی جاتی ہے۔

اقوام متحدہ کے انسانی حقوق کمیشن نے حال ہی میں کہا کہ وہ گوانتانامو میں زبردستی خوراک کھلانے کو تشدد سے تعبیر کرتے ہیں۔ امریکی فوج ان الزامات کی تردید کرتی ہے۔