حملہ آور لائبریری ٹاور کو اڑانا چاہتے تھے

ان کا کہنا تھا کہ منصوبہ بندی کرنے والوں کا جوتے میں بم کے دھماکے ساتھ جہاز کے کاک پٹ پر قبضے کا ارادہ تھا۔

صدر بش نے منصوبے کی تفصیلات بتاتے ہوئے کہا کہ حملہ آور جہاز کو لاس اینجلز میں واقع لائبریری ٹاور سے ٹکرانا چاہتے تھے۔ جس کا نام اب یوایس بینک ٹاور ہے۔

انہوں نے کہا کہ القاعدہ نے یہ کام کرنے کی ذمہ داری اسلامی بنیاد پرست گروہ جامعہ اسلامیہ ( جے آئی) کو سونپی تھی۔

صدر بش نے کہا کہ گیارہ ستمبر کے حملوں کا مبینہ ماسٹر مائنڈ خالد شیخ محمد بھی اس منصوبے کے پس پردہ لوگوں میں شامل تھا۔

انہوں نے کہا کہ اس مرتبہ خالد شیخ محمد نے عرب وضح قطع کے حملہ آوروں کی بجائے جنوب مشرقی ایشیا سے تعلق رکھنے والے نوجوان بھرتی کیے جن کے بارے میں خالد کا یقین تھا کہ ان سے کسی کو شبہ نہیں ہو گا۔

اس منصوبے پر کام اکتوبر دو ہزار ایک میں شروع ہوا لیکن دو ہزار دو کے آغاز میں القاعدہ کے ایک اہم کارکن کی گرفتاری عمل میں آنے سے اس پر کام رک گیا۔

جے آئی کے مشتبہ انڈونیشیائی سربراہ ہمبلی کی تھائی لینڈ میں گرفتاری سے بالاخر یہ منصوبہ ناکام ہو گیا۔

بش انتظامیہ نے اس منصوبے کی تفصیلات بتاتے ہوئے کہا کہ یہ منصوبہ القاعدہ کے دس دوسرے ناکام منصوبوں میں سے ایک ہے۔