ان کی کارروائیوں سے باغیوں کے حامیوں کو مزید جواز ملتا ہے: انسانی حقوق کی تنظیمیں

ڈرائیور گاڑی کے ایکسلریٹر پر دباؤ بڑھا رہا ہے اور سپیڈومیٹر پر سوئی ایک سو پچاس میل فی گھنٹہ کی رفتار دکھا رہی ہے۔

گاڑی تھوڑے تھوڑے وقفے کے بعد رکتی ہے۔ ڈرائیور شیشہ نیچے کر کے اندھیرے میں کسی کو سلام کرتا ہے۔ ’وعلیکم اسلام رمضان‘ امریکی وردی پہنے ایک باریش اور مسلح شخص جواب میں کہتا ہے۔

یہ چیچنیا میں سب سے زیادہ طاقتور سمجھے جانے والے شخص رمضان قادیروو کا گاؤں ہے۔ قادیروو ریاست کے وزیر اعظم ہیں اور در حقیقت وہی اس کے اصل حکمران ہیں۔

قادیروو کی ذاتی فوج بھی ہے۔ سرکاری طور پر اسے انسداد دہشت گردی سکواڈ کہا جاتا ہے لیکن عام اصطلاح میں اس فوج کے ارکان کو ’قادیروو کے آدمی‘ کہا جاتا ہے۔

	قادیروو کا پالتو شیر

قادیروو نے گاڑی کے رکتے ہی سیٹی بجائی اور تیس سیکنڈ میں ان کے پوری طرح مسلح آدمی حکم کے لیے تیار کھڑے تھے۔ قادیروو کے آدمیوں کو سیٹی بجنے کے بعد تیاری کے لیے چالیس سیکنڈ دیے جاتے ہیں۔

قادیروو نے اپنے فوجیوں کی طرف اشارہ کرتے ہوئے کہا کہ’ان کو دیکھیں، امریکی وردی، روسی ہتھیار، اسلامی نظریات اور چیچن جذبہ۔ یہ ناقابل شکست ہیں‘۔

روس چیچنیا میں ’امن‘ کے قیام کے لیے قادیروو اور ان کے آدمیوں پر انحصار کر رہا ہے۔ یہ فوج روس کی ’چیچنائزیشن‘ پالیسی کی ایک زندہ مثال ہے۔ اب چیچنا میں انتظام کو روس کی فوج کی بجائے یہی لوگ چلاتے ہیں۔

قادیروو کا کہنا کہ ’ہم نے چیچنیا کو روس میں پر امن ترین علاقہ بنا دیا ہے اور عنقریب یہ دنیا کا بھی پر امن ترین علاقہ ہوگا اور لوگ یہاں چھٹیاں منانے آئیں گے‘۔

’ہمیں صرف چند اور شیطانوں کو مارنا ہے پھر کام مکمل ہو جائے گا۔ ہم امن چاہتے ہیں۔ اور اگر کوئی ہمارے ساتھ امن کے ساتھ نہیں رہنا چاہتا تو ہم اس کو ایسا کرنے پر مجبور کر دیں گے‘۔

انسانی حقوق کی تنظیمیں اتنی پر امید نہیں ہیں۔ ان کا کہنا ہے کہ ’رمضان چیچنیا میں استحکام نہیں لا رہے۔ ان کی کارروائیوں سے باغیوں کے حامیوں کو مزید جواز ملتا ہے‘۔

ان پر الزام لگایا گیا ہے کہ ان کی فوج کے ارکان مخالفین کو گرفتار کرتے ہیں اور پھر ان کا پتہ نہیں چلتا۔ قادیروو کی فوج پر لوگوں کو اغوا کرنے اور تشدد کا الزام لگایا جاتا ہے۔

قادیروو اس چیز سے انکار رکتے ہیں جبکہ روس بظاہر ان الزامات کو نظر انداز کر رہا ہے۔