بیسلان کے سکول میں خون کی جگہ قالین پر پھول نظر آتے ہیں۔

قبضے کے دوران اس سکول میں 1200 لوگوں کو یرغمال بنا لیا گیا تھا، جن میں سے تین سو تیس لوگ خون خرابے میں ہلاک ہوگئے تھے ۔ ہلاک ہونے والوں میں سکول کے بچے، مدرس اور دوسرے لوگ شامل تھے۔

اسکول کے فرش پر بچھا قالین جو تب خون سے رنگین ہو گیا تھا آج پھولوں سے بھرا دکھائی دیتا ہے۔
وہاں کی جماعتوں میں لگے بورڈز پر آج بھی اس دن کے لکھے ہوئے کئی پیغامات موجود ہیں : جیسے ’ ہم کبھی نہیں بھولیں گے‘۔ ’ خدا تم کو بچائے‘ اور جلدی میں لکھی یہ تحریر ’ بدلہ اور خون‘۔

سکول کھلنے سے ایک دن قبل وہاں کے مدرسوں کی جانب سے تحریر کی ہوئی ایک سطر ان پیغامات سے ٹھیک اوپر، کچھ اس طرح لکھی نظر آتی ہے ’علم و دانش کا ملک آپ کا استقبال کرتا ہے‘۔

سکول کی عمارت کے مختلف حصوں، کھلی جگہوں اور سکول سے ہسپتال کے تمام راستے میں جا بجاان بچوں کی تصویریں اور پوسٹر نظر آتے ہیں جو اب تک لاپتہ ہیں۔

بیسلان کے درجنوں خاندانوں کو ابھی تک ان کے دلاروں کی کوئی خبر نہیں ملی ہے۔ یہاں تقریبا ً پچاس بچے اب تک گم ہیں۔ اور اس غیر یقینی صورتحال نے ان کے رشتہ داروں کو درد و کرب میں ڈبو دیا ہے۔

اروتین علی خان جو اب تک اپنی اہلیہ اور ایک بیٹی کو تلاش کر رہے ہیں

وہ مزید کہتے ہیں ’ کوئی سرکاری اطلاع مہیا نہیں ہے۔ مجھے صرف افواہوں کا سہارا لینا پڑتا ہے۔ شاید ان کو پیسوں کی لالچ میں یرغمال بنا لیا گیا ہے۔ یا ان کو بھیڑیوں نے کھالیا اور وہ مرگئے ہیں۔ مجھے کس طرح ان کا پتہ چلے گا‘۔

اسکول پر چیچنیا کے علٰیحدگی پسندوں کے قبضے کے ایک ماہ بعد بیسلان کے بارہ خاندانوں کو ان کے رشتہ داروں کے مارے جانے کی خبر وہاں سے پانچ سو میل دور کے مردہ خانے سے وصول ہوئی ۔ اور اب وہ ان کو وہاں سے لانے میں لگے ہیں۔ لیکن ان کی پریشانیاں پھر بھی جاری رہیں گی۔

اروتین ہی کی طرح ان کو بھی ہرجانہ (معاوضہ) وصول کرنے کے لیے کاغذات لے کر سرکاری دفتروں کے دھکے کھانے پڑینگے۔

حقوق انسان کے لیے کام کرنے والوں کی جانب سے امداد تو جاری ہے۔ لیکن بیسلان کے لوگوں کو کبھی ایسا بھی لگتا ہے کہ شاید ان کو ان کے غم کے ساتھ اکیلے ہی چھوڑ دیا جائے گا۔

وہ قالین جو قبضے کے دوران لہو سے بھیگ گیا تھا اب پھولوں سے ڈھکا ہوا ہے

تاتیانا لاورنتیوا نامی ماہر نفسیات نے بی بی سی کے نمائندے کو بتایا ’ یہاں
مدد کے طور پر چاکلیٹ اور کھلونوں کے انبار آرہے ہیں ۔لیکن یہاں کے حالات کا تقاضہ کچھ اور ہے۔ ہم کو یہاں بچوں کو مطمئن اور پر سکون کرنے کے لیے آلات، مشینیں اور ایسا تربیت یافتہ عملہ درکار ہے جو بچوں کی ذہنی حالت بہتر بنانے میں مدد دے سکے۔ ہمیں یہاں کام کرنے کے لیے مزید جگہ چاہیے۔‘

تاتیانا کے پاس کئی بچے آکر کھیلتے، بیٹھتے، اور اس ذہنی کیفیت کو بھلانے کی کوشش کرتے جو ان پر قبضے کے دوران طاری ہوئی تھی ۔ لیکن ان کا کہنا ہے کہ ایک وقت میں وہ یہاں صرف تیس بچوں کا اس طرح علاج مہیا کیا جاسکتا ہے ۔
جو کہ ضرورت سے بہت کم ہے۔ تاتیانا کہتی ہیں ’ اس سانحے میں بچ جانے والے ہر بچے کو نفسیاتی علاج کی ضرورت ہے ‘۔

بیسلان میں اس سانحے کی سوگواری کے چالیس دن ختم ہونے ہی والے ہیں۔ لیکن وہاں کے لوگوں کو اب بھی یہ خدشہ گھیرے ہوئے ہے کہ کہیں پھر نیا خون خرابہ شروع نہ ہو جائے ۔