مرنے والوں کی یاد میں

بیسلان میں ہلاک ہونے والوں کی یاد میں پورا ملک سوگ منا رہا ہے۔

یک جہتی کے طور پر ہزاروں کی تعداد میں ماسکو کے باسی بینر، جھنڈے اور مذہبی علامات اٹھائے ہوئے ہیں۔

انٹرفیکس نیوز ایجنسی کے مطابق 130,000 افراد کریملن کی ریلی میں شریک ہیں اور ’دہشت گردی کے خلاف روس‘ کے بینر اٹھائے ہوئے ہیں۔

اے ایف پی نیوز ایجنسی نے ریلی میں شریک ایک بزرگ شخص ویلری کے حوالے سے لکھا ہے کہ ’تم کس طرح بچوں کو ہلاک کر سکتے ہو اور گولی مار سکتے ہو۔ میں یہاں اس لیے آیا ہوں کہ روس روس کے منہ پر تماچہ مارا گیا ہے اور ہم یہ برداشت نہیں کریں گے‘۔

تاہم نامہ نگاروں کے مطابق روسی انتظامیہ کے خلاف بھی لوگوں کا غصہ بڑھ رہا ہے کہ اس نے سکول کے مسئلے کو ٹھیک طریقے سے حل کرنے کی کوشش نہیں کی اور اس میں 335 افراد اپنی جانیں کھو بیٹھے۔

تاہم بیسلان میں ابھی بھی کئی لاشیں ایسی پڑی ہیں جن کی شناخت نہیں ہوئی۔ ان کی شناخت کے لیے ڈی این ٹیسٹ کیا جائے گا۔

حکام کے مطابق 107 لاشیں ایسی ہیں جو آگ اور بم دھماکوں کی وجہ سے شناخت کے قابل نہیں رہیں۔