صدام حسین نے گرفتاری کے وقت کوئی مزاحمت نہیں کی تھی

یہ پستول صدر بش کو صدام حسین کو گرفتار کرنے والے امریکی فوجیوں نے پیش کی تھی۔

صدر بش نے اس پستول کو اوول آفس سے ملحقہ پڑھائی کے کمرے میں رکھا ہوا ہے جسے عام طور پر یادگاری اشیاء کے رکھنے کے لئے استعمال کیا جاتا ہے۔

صدام حسین کو دسمبر میں تکریت میں اپنے گھر کے قریب واقع ایک تنگ و تاریک زیرِ زمین پناہ گاہ سے گرفتار کیا گیا تھا۔

صدام حسین اپنی حکومت کے خاتمے کے بعد سات ماہ تک مختلف مقامات پر چھپتے رہے تھے۔

صدام حسین کی پستول کے بارے میں خبر پہلی بار ٹائم میگزین میں چھپی تھی جس میں صدر بش سے ملاقات کرنے والوں کے حوالے سے کہا گیا تھا کہ صدام حسین کی گرفتاری کے وقت پستول میں کوئی گولی نہیں تھی۔

اس سے پہلے چھپنے والی خبروں میں کہا گیا تھا کہ پستول گولیوں سے بھری ہوئی تھی۔

ٹائم میگزین نے صدر بش سے ملاقات کرنے والے ایک شخص کے حوالے سے بتایا ہے کہ صدر بش کو اس بات پر فخر ہے کہ یہ پستول ان کے پاس ہے۔

وائٹ ہاؤس کے ترجمان جم مورل کا کہنا ہے کہ صدر بش کو امریکی فوج کی بہادری اور کارکردگی پر فخر ہے اور وہ خود کو خوش قسمت تصور کرتے ہیں کہ انہیں یہ پستول صدام حسین کو گرفتار کرنے والے فوجیوں نے پیش کی ہے۔