 |  لیبیا کی جانب سے میزائل اور ایٹمی پروگرام کا تمام سامان بھیجے جانے پر امریکہ صدر قذافی سے انتہائی خوش ہے |
لیبیا نے ایک جہاز میں اپنا وہ تمام سامان بھر کر امریکہ روانہ کر دیا ہے جو اس نے اپنے ایٹمی پروگرام اور تنصیبات کے لیے حاصل کیا تھا۔ وائٹ ہاؤس کے جاری کردہ ایک بیان کے مطابق سنیچر کو ایک جہاز ایٹمی تنصیبات اور پروگرام سے متعلق آلات اور فاضل پرزے تک لے کر امریکہ کے لیے روانہ ہوا ہے ان آلات اور پرزوں کا وزن تقریباً پانچ سو ٹن بتایا گیا ہے۔ وائٹ ہاؤس کے ترجمان کا کہنا ہے کہ اس سامان میں طویل فاصلے تک مار کرنے والے میزائل اور لانچر بھی شامل ہیں۔ اس قبل جمعہ کو لیبیا نے بین الاقوامی ماہرین کی زیر نگرانی بیس ٹن وزنی تین ہزار کھوکھلے کیمیائی بم تباہ کیے تھے۔ کیمیائی ہتھیاروں کی تخفیف پر عملدرآمد کی نگرانی کے لیے اقوام متحدہ کی تنظیم نے اسے لیبیا کے ہتھیاروں کی تباہی کا یہ پہلا مرحلہ قرار دیا تھا۔ اس کے ساتھ ہی لیبیا نے کیمیائی ہتھیاروں کے بارے میں تمام تفصیلات سے اقوام متحدہ کو آگاہ کر دیا تھا۔ لیبیا نے گزشتہ دسمبر میں برطانوی اور امریکی حکام کے ساتھ طویل مذاکرات کے بعد وسیع پیمانے پر تباہی پھیلانے والے تمام ہتھیاروں کے خاتمے کے ارادے کا اظہار کیا تھا۔ |  لیبیا کی ایٹمی تنصیبات کی ایک حصہ |
لیبیا نے امید ظاہر کی ہے کہ اس کے ان اقدام کے بعد اب اس کے اور امریکہ کے تعلقات معمول پر آ جائیں گے۔ امریکہ نے اگرچہ ابھی لیبیا پر لگائی جانے والی تجارتی پابندیاں ختم کرنے کا اعلان نہیں کیا تاہم اس نے لیبیا واپس جانے کے خواہشمند امریکی اداروں کو تیاریاں کرنے کی اجازت دے دی ہے۔ | 
یہ صفحہ دوست کو ای میل کیجیئے
پرِنٹ کریں
