یہ صفحہ دوست کو ای میل کیجیئے		پرِنٹ کریں

صدر صدام نے اپنی ’آزادی‘ کے آخری ایام یہاں گزارے

امریکہ نے واضح کیا ہے کہ صدام حسین کے خلاف مقدمہ چلائے جانے میں وقت لگ سکتا ہے۔

بش انتظامیہ کے ایک اعلیٰ عہدے دار نے کہا کہ مقدمہ چلانے سے پہلے انہیں اس کے طریقہ کار کا تعین کرنا پڑے گا اور شواہد لہ بھاری انبار کو کھنگالنا پڑے گا۔

اس سے پہلے اقوام متحدہ کے سیکرٹری جنرل کوفی عنان نے کہا ہے کہ عراق کے معزول صدر صدام حسین پر چلائے جانے والے مقدمہ کی کارروائی شفاف اور منصفانہ ہونی چاہئے۔

انہوں نے واضح کیا تھا کہ اقوام متحدہ صدام حسین کو موت کی سزا دینے کے خلاف ہے۔

انہوں نے توقع ظاہر کی کہ صدام حسین کی گرفتاری کے بعد عراق میں مفاہمت کی فضا قائم کرنے کی راہ ہموار ہوجائے گی۔

مسٹر کوفی عنان نے یہ بیان ایک ایسے وقت دیا ہے جب عالمی ادارہ عراق کے مستقبل پر بحث کرنے والا ہے۔

اس سے قبل امریکی صدر بش نے صدام حسین کے لئے سزائے موت تجویز کرنے سے گریز کیا اور کہا کہ امریکہ عراقیوں کے ساتھ ملکر اس بات کو یقینی بنائے گا کہ مقدمہ کی کارروائی پر بین الاقوامی برادری نظر رکھ سکے۔

اقوام متحدہ کے سربراہ نے کہا کہ ان کے خیال میں ایک مؤثر قانون کے تحت مقدمہ کی کارروائی کے لئے بیرونی مدد کی ضرورت پیش آئے گی۔