وسعت اللہ خان بی بی سی اردو ڈاٹ کام

	مظفرآباد میں متاثرین امداد لے کر جا رہے ہیں۔

ان دونوں طرح کے متاثرین کو خیمے چاہئیں۔لیکن اگر انہیں فوری اور غیر فوری ضرورت مندوں کی کیٹگریز میں بانٹ دیا جائے تو اسوقت بھی اسلام آباد اور راولپنڈی کے امدادی گوداموں اور متاثرہ علاقوں میں سرگرم سرکردہ تنظیموں کے پاس اتنے خیمے ضرور ہیں جو فوری ضرورت کے متاثرین کے سر چھپا سکیں۔

اگر ایسے متاثرین یا انکے نوکر لائن میں نہ لگیں جو ماشااللہ کم ازکم لکھ پتی ضرور ہیں اور نہ صرف اپنی بلکہ دوسروں کی مدد کے بھی قابل ہیں تو اتنی اشیائے خوردونوش ضرور موجود ہیں جو فوری مستحقین کی سال بھر کی ضروریات کے لئے کافی ہوں۔

وہ علاقے جو اسوقت بھی ناقابلِ رسائی ہیں اور صرف ہیلی کاپٹر ہی رسد پہنچا سکتے اور زخمیوں کو نیچے لا سکتے ہیں۔اگر وھاں تک رضاکار ڈاکٹروں کی ٹیموں اور آپریشن تھیٹر کے بھاری سامان کو ائیر لفٹ کیا جا سکے تو اتنے فیلڈ اسپتال ضرور قائم ہوسکتے ہیں جو ناقابلِ رسائی حالات میں اب بھی لوگوں کو مرنے سے بچا سکیں۔

اسوقت متاثرہ علاقوں میں جتنے ہیلی کاپٹرز استعمال ہورہے ہیں ایک تو پہلے ہی محدود تعداد میں ہیں اور ان میں سے بھی تقریباً آدھے براہ راست یا بلاواسطہ وی آئی پی نقل وحرکت میں استعمال ہورہے ہیں۔اب بھی اگر اس وی آئی پی موومنٹ کو اگلے پندرہ روز کے لئے روک دیا جائے تو دوگنا سامان مشکل علاقوں میں بھیجا جاسکتا ہے اور دوگنے زخمی نیچے قائم فیلڈ اسپتالوں تک پہنچائے جاسکتے ہیں۔

اگر سرکردہ ملکی یا غیر ملکی فلاحی تنظیموں اور فوج کے امدادی نظام کے مابین اب بھی امداد کی تقسیم کے طریقے پر باہمی غلط فہمیاں دور ہوجائیں اور ان سب کو ایک دوسرے کے بارے میں معلوم ہو کہ کس کے پاس کس علاقے میں کتنی رسد اور وسائیل موجود ہیں تو چند علاقوں میں امدادی سرگرمیوں پر زور اور باقی علاقوں کو نظر انداز کرنے کے رحجان کا تدارک ہوسکتا ہے۔

لیکن جس طرح کے حالات میں جس انداز سے کام ہورھا ہے اگر قارون کا خزانہ بھی متاثرہ علاقے میں اتار دیا جائے تب بھی ترجیحی مصیبت زدگان کی تسلی بخش فوری اور موثر امداد کے نیٹ ورک کا قیام مشکل نظر آرھا ہے۔

بس ایک دفعہ میڈیا سرکس کا زور ٹوٹ جائے اور برف اس علاقے کو اپنی آغوش میں لے لے اسکے بعد ہر متاثر کو ہرشے مل جائے گی بشرطیکہ اسکی برادری بااثر ہو یا اسکے پاس پرچی ہو یا پھر بازار میں پہنچنے والی امدادی رسد خریدنے کے نوٹ۔