انتخابات: پاکستانی امریکی ووٹرز کی رائے

اس سلسلے میں ہم خاص طور پر پاکستانی امریکی، انڈین امریکی اور جنوب ایشیائی امریکی باشندوں کی رائے جاننا چاہتے ہیں جو ان انتخابات میں حصہ لیں گے۔

کیا آپ امریکہ میں رہتے ہیں؟ ان دنوں امریکہ کا ماحول کیسا ہے؟ اگر آپ مسلمان اور پاکستانی ہیں تو آپ کو یہاں رہنا کیسا لگ رہا ہے؟ آپ کے علاقے میں الیکشن کی گہما گہمی کا کیا عالم ہے؟ کیا آپ کے اردگرد دوسرے مسلمان اور آپ کے خاندان کے افراد انتخابی عمل میں خود کو شامل محسوس کرتے ہیں؟ کیا آپ ووٹ ڈالیں گے؟ اگر ووٹ ڈالیں گے تو کس کو اور کیوں؟

آپ کے لئے انتخابات کے دوران حصہ لینے والی جماعتوں کے ایجنڈے پر موجود کون کون سے نکات اہم ہوں گے؟ امریکی خارجہ پالیسی کے امور خصوصاً عراق پر امیدواروں کا نقطِ نظر آپ کے لئے کتنے اہمیت کا ہے؟ آپ یا آپ کے والدین جس ملک میں پیدا ہوئے، امیدواروں کی اس ملک کے بارے میں رائے آپ کے لئے کس قدر اہم ہے؟اس سلسلے میں ہمیں اپنی رائے بھیجئے۔

آپ جتنی تفصیلی رائے بھیجیں گے اتنا ہی بہتر ہوگا۔ آپ ہمیں اپنے یا اپنے دوستوں کے ساتھ پیش آنے والے واقعات بھی بھیج سکتے ہیں۔

آپ کی رائے

عفاف اظہر:
میں کیری کو ووٹ دینا بہتر سمجھتا ہوں کیونکہ بش کو سب دیکھ چکے ہیں کہ وہ کتنے انتہا پسند ہیں اور اپنی ضد کی خاطر کتنوں کا خون بہا چکے ہیں۔ ویسے تو کیری سے بھی کچھ خاص امیدیں نہیں ہیں لیکن لگتا ہے وہ کم از کم اتنے انتہا پسند نہیں ہیں اس لیے تھوڑی سی امید کی جھلک نظر آتی ہے کہ شاید بش کے جانے اور کیری کے آنے سے باقی دنیا کو کچھ سکون کا سانس آئے۔

محمد اسلام، ڈریم لینڈ:
کچھ دن پہلے میں کانگو، کنساشا کے ایک نوجواں ایلے سے ملا۔ میں نے پوچھا کہ کیا تم ’کریبیئن‘ ہو تو وہ اچانک غصے میں آگیا اور کہنے لگا کہ تم مجھے ’امریکن‘ کہہ رہے ہو۔ میں نے اسے سمجھایا کہ بھائی میں نے تو تمہیں صرف کریبیئن کہا تھا۔ تاہم جھے لگا کہ اس کے لیے امریکی کہلانا کتنا برا تھا۔ اس کے بعد اس نے امریکہ کے بارے میں جو کچھ کہا وہ میں نہیں لکھ سکتا۔ ایسے میں کون امریکہ میں ووٹ دینا چاہے گا۔